Бил Гејтс, основач на „Мајкрософт“, го даде своето предвидување за тоа кои три сектори, односно професии ќе го преживеат подемот на вештачката интелигенција.

Со оглед на неговата улога во компјутерската револуција, многумина внимателно ги следат неговите размислувања за технологијата.

Иако повеќе не е вклучен во секојдневното работење на „Мајкрософт“, Гејтс го сподели своето гледиште за иднината на пазарот на трудот во свет кој брзо се менува под влијание на ВИ.

Вештачката интелигенција станува сè поприсутна, а додека некои ја гледаат како револуционерна алатка, други стравуваат дека може да значи крај на нивните кариери.

Сепак, Гејтс верува дека три групи професии не треба да стравуваат.

Експерти за вештачка интелигенција

Иако на многумина ова може да им изгледа изненадувачки, луѓето што се одговорни за создавање на самите системи за вештачка интелигенција најверојатно ќе ги задржат своите работни места.

И покрај тоа што ВИ значително напредуваше во генерирање кодови, сè уште ѝ недостигаат прецизноста и вештината потребни за изработка на сложен софтвер.

Гејтс смета дека луѓето програмери и понатаму ќе бидат неопходни за поправање на грешките, подобрување и усовршување на системите.

Накратко, на ВИ ѝ се потребни луѓе што ќе управуваат со неа. Вредноста на програмерите нема да опадне, напротив, нивните вештини ќе станат уште поважни.

Експерти во областа на биологијата и медицината

Безбедни се и професиите што се потпираат на креативност и критичко размислување, како медицинските истражувања и научните откритија.

Вештачката интелигенција тешко може да ги реплицира овие квалитети. Иако може да анализира огромни количини податоци и да помогне во дијагностицирање болести, таа не успева да создава нови концепти.

ВИ нема способност за револуционерни откритија, ниту може да формулира нови хипотези. Затоа Гејтс смета дека биолозите и медицинските експерти ќе имаат клучна улога во понатамошното разбирање на животот и напредокот на медицината, при што ВИ ќе биде алатка, а не замена.

Експерти во енергетскиот сектор

Можат да здивнат и вработените во енергетскиот сектор. Станува збор за област која е премногу голема и сложена за да биде управувана исклучиво од ВИ.

Без разлика дали станува збор за нафта, нуклеарна енергија или обновливи извори, експертите во оваа индустрија се одговорни за пронаоѓање одржливи решенија и задоволување на енергетските потреби на човештвото.

Гејтс нагласува дека ВИ може да помогне во анализа на податоци и зголемување на ефикасноста, но човечката експертиза останува клучна при носење важни одлуки, особено во кризни ситуации.

Гејтс, сепак, признава дека неговите предвидувања можеби не се стопроцентно точни. Тој истакна дека влијанието на вештачката интелигенција врз пазарот на трудот ќе се развива на начини кои сè уште не можеме да ги предвидиме слично како што тоа беше случај со индустриската револуција и појавата на интернетот.

Извор: 6yka.com
Фото: Screenshot/YouTube