Египетскиот адвокат Махмуд ал Семари поднесе тужба против „Нетфликс“ за кршење на законите за медиуми и обидите „да го избрише египетскиот идентитет“, а и најпознатиот археолог во земјата, Захи Хавас, стои на ставот дека Клеопатра имала бела кожа, а не црна.

Родена во Александрија во 69 година пр.н.е., Клеопатра Седма била последната владетелка од династијата на Птоломеј Први, генералот на Александар Македонски. Таа на престолот го наследила нејзиниот татко Птоломеј Дванаесетти и владеела од 51. година пр.н.е. до нејзината смрт во 30. година пр.н.е. Потоа Египет потпаднал под римска власт. Припадниците на Птоломејската династија говореле најмалку девет јазици, меѓу кои и древномакедонски, старогрчки, но и сириски, медски, етиопски јазик, според Плутарх, а самата таа била меѓу ретките владетели што научиле и древноегипетски.

Етничкото потекло на мајката на Клеопатра е непознато, а некои историчари велат дека е можно таа да била домородна Египќанка, или од друг дел на Африка.

Клеопатра во серијата на „Нетфликс“ овој пат ја глуми Адел Џејмс, која е од делумно африканско црнечко потекло. Продуцентите велат дека тоа е „одраз на вековната дебата за расата на Клеопатра“.

Џејда Пинкет-Смит, американска глумица која е наратор и продуцент на оваа драма, рече: - Не гледаме, ниту слушаме често приказни за црните кралици, и мене и на мојата ќерка, и на нашата заедница ни е многу важно овие приказни да бидат познати.

Сите овие изјави се осудени во Египет. Захи Хавас, истакнат египтолог и поранешен министер за антиквитети, тврди дека тоа е измислица.

- „Нетфликс“ се обидува да предизвика конфузија со ширење лаги дека потеклото на египетската цивилизација е црнечко, изјави тој.

Махмуд ал Семари побара од државниот обвинител да преземе „неопходни правни мерки“ и да го блокира пристапот до услугите на „Нетфликс“ во Египет. „Нетфликс“ е обвинет за промовирање афроцентризам и бришење на египетскиот идентитет.