Милиони луѓе го започнуваат денот со шолја кафе пред појадок, но последните години сѐ почесто се предупредува дека таа навика би можела да им наштети на стомакот, хормоните и општото здравје.
Кафето е еден од најпопуларните пијалаци во светот, а освен будењето, се поврзува и со подобро расположение, поголема концентрација, па дури и со помал ризик од некои болести, како дијабетес тип 2 и Алцхајмерова болест. Но, прашањето што постојано се враќа е дали е проблем да се пие на празен стомак?
Може ли кафето да го оштети желудникот?
Една од најчестите причини за грижа е фактот дека кафето го поттикнува производството на желудочна киселина. Поради тоа, многумина веруваат дека може да предизвика киселини, рефлукс, мачнина или да ги влоши симптомите на синдромот на иритабилно црево.
Особено е раширено мислењето дека пиењето кафе без храна е лошо бидејќи желудникот тогаш нема „заштита“ од киселината.
Сепак, досегашните истражувања немаат пронајдено цврсти докази дека кафето предизвикува дигестивни проблеми кај повеќето луѓе, без оглед на тоа дали се пие со појадокот или на празен стомак. Кај лицата што се чувствителни на кафе можат да се појават киселини или непријатност, но тие често се јавуваат независно од тоа дали лицето претходно јадело.
Што е со хормоните на стрес?
Друго често тврдење е дека кафето на празен стомак го зголемува нивото на кортизол, хормонот на стрес.
Кортизолот природно се покачува наутро по будењето, а кофеинот може дополнително да го поттикне неговото лачење. Долготрајно зголемените нивоа на кортизол се поврзуваат со проблеми како висок притисок, дијабетес и срцеви болести, поради што многумина се загрижени.
Сепак, истражувањата покажуваат дека тој ефект е краткотраен. Кај луѓето што редовно пијат кафе организмот се приспособува, па зголемувањето на кортизолот е помалку изразено. Некои студии немаат пронајдено значајни промени.
Исто така, нема докази дека појадокот го спречува тој ефект на кофеинот.
Кофеинот сепак може да предизвика несакани ефекти
Иако кафето не е проблематично дури ни на празен стомак за повеќето луѓе, кофеинот може да предизвика одредени несакани ефекти.
Кај почувствителните лица може да предизвика нервоза, забрзано чукање на срцето, анксиозност, главоболки или проблеми со спиењето. Експертите препорачуваат дневниот внес на кофеин да се задржи под 400 милиграми дневно, што е приближно четири до пет шолји кафе.
Треба ли да се избегнува утринското кафе?
За повеќето луѓе одговорот е – не.
Иако кафето го зголемува лачењето на желудочната киселина и може краткотрајно да го зголеми кортизолот, нема цврсти докази дека пиењето кафе на празен стомак е опасно за здрави лица.
Фото: freepik