Експертите од Универзитетот во Јужна Австралија велат дека бустер-дозите не се единствените што можат да понудат заштита од ковид-19 - здравите нивоа на витамин Д исто така може да играат улога.
Во ново истражување, спроведено во партнерство со Кралскиот колеџ во Лондон и Фондацијата „Гајс и Св. Томас“, истражувачите пронашле јасна врска помеѓу ниските нивоа на витамин Д и зголемениот ризик од хоспитализација заради вирусот. Не е пронајдена поврзаност помеѓу ниското ниво на витаминот Д и ризикот од заразување со ковид-19.
Студијата проценила 151.543 луѓе од „Биобанк“ во Велика Британија, спроведувајќи анализи за да утврди дали ризикот од ковид-19 е поголем кај луѓето со недостиг на витамин Д, во споредба со оние што имале нормални нивоа на витамин Д.
Во Австралија речиси една четвртина од возрасните - околу 4 милиони луѓе - имаат недостиг на витамин Д. Глобално, околу 1 милијарда луѓе имаат недостиг на витамин Д, при што 50 % од населението покажува недоволно ниво на витамин Д.
Австралискиот истражувач и епидемиолог, д-р Кери Бекман вели дека наодите би можеле да ги идентификуваат ранливите луѓе и да ги насочат кон идните совети за јавно здравје.
- Витаминот Д игра клучна улога во регулирањето на имунолошкиот систем, па затоа е веројатно дека ниските нивоа може да влијаат врз тоа како телото реагира на инфекции како ковид-19. Нашата студија покажа дека луѓето со недостиг на витамин Д имале поголема веројатност да бидат хоспитализирани со ковид-19 отколку оние со здрави нивоа на витамин Д, но тие воопшто немале поголема веројатност да го добијат вирусот - вели д-р Бекман.
Студијата, исто така, ги истражувала поврзаностите помеѓу витаминот Д и исходите од ковид -19 кај пациенти со рак, како и кај различни етнички групи.
Луѓето од азиско или африканско потекло покажале малку поголем ризик од инфекција доколку имале ниски нивоа на витамин Д, иако поврзаноста помеѓу ниското ниво на витамин Д и тешката болест е забележана само кај луѓе од бела раса.
Не е пронајдена поврзаност помеѓу витаминот Д и исходите од ковид-19 кај луѓе на кои претходно им бил дијагностициран рак, иако истражувачите предупредуваат дека ова може да ја одразува помалата големина од примерокот.
Д-р Бекман вели дека иако ризикот од ковид-19 се намалил со текот на времето, вирусот останува проблем за јавното здравје.
- Ковид-19 можеби не е закана како некогаш, но сепак влијае врз благосостојбата на луѓето. Разбирањето на тоа кој е најмногу изложен на ризик им помага на тие лица да преземат дополнителни мерки на претпазливост, вклучително и следење на нивото на витамин Д. Можно е луѓето што се во лоша здравствена состојба за почеток да имаат и ниски нивоа на витамин Д. Значи, во оваа фаза не знаеме дали додатоците на витамин Д сами по себе би можеле да ја намалат сериозноста на ковид-19. Тоа е област што вреди да се истражи - особено затоа што продолжуваме да живееме со вирусот - заклучил д-р Бекман.
Извор: medicalxpress.com
Фото: Freepik