Холандскиот град Ајндховен е прогласен за најопуштен град за живеење во светот. Според истражувањето што го спроведе дигиталната финансиска компанија „Ремитли“, овој европски град го понел признанието благодарение на ниските стапки на криминал, добро осмислената инфраструктура и релативно попристапните трошоци за живот во споредба со другите големи европски градови.

Како изгледа животот во Ајндховен?

Животот во Ајндховен често се опишува како мирен и балансиран. Градот е доволно голем за да ги понуди сите содржини на урбаниот живот, но без претерани метежи и забрзано темпо. Токму таа комбинација на функционалност и умереност е причината поради која Ајндховен често се доживува како град со пониско ниво на стрес.

Жителите во голема мера се потпираат на велосипеди и јавен превоз, што ги намалува сообраќајот, бучавата и секојдневниот метеж. Градот е плански уреден, со добро поврзани населби и доволно зелени површини, што позитивно влијае врз квалитетот на животот. Работната култура ја нагласува рамнотежата меѓу работата и приватниот живот, со флексибилни модели на работа и помал притисок во секојдневието.

Ајндховен е и меѓународен град со отворена и толерантна атмосфера. Општествениот и културниот живот се активни, но ненаметливи, без чувство на пренатрупаност. Сето тоа го прави Ајндховен место каде што се живее практично, организирано и со помал стрес во споредба со многу други европски градови.

Трошоци за живот

Трошоците за живот се релативно високи, но пониски отколку во најголемите холандски градови. Најголемиот трошок е домувањето: киријата за еднособен стан во центарот на градот се движи од 1.200 до 1.400 евра месечно, додека надвор од центарот е нешто поповолна - од 900 до 1.200 евра.

Цените на храната и основните потреби ги следат западноевропските стандарди, а оброк во попристапен ресторан чини од 15 до 20 евра. Вечера за двајца во ресторан од средна категорија изнесува од 65 до 80 евра.

Многу жители користат велосипеди за да ги намалат трошоците за превоз, додека јавниот превоз е добро организиран, но поскап во споредба со некои други европски градови.

Култура

Културата во Ајндховен е силно поврзана со дизајнот, технологијата и современата уметност. Градот е познат по модерните музеи, галерии и културни настани што често ги спојуваат креативноста и иновациите. Многу поранешни индустриски простори се претворени во културни и општествени центри, а културниот живот е активен, но без метежот типичен за поголемите метрополи.

Ноќен живот

Ноќниот живот во Ајндховен е разновиден, но ненаметлив, што се вклопува со опуштениот ритам на градот. Наместо големи и бучни клубови, акцентот е ставен на барови, пабови и помали клубови со електронска музика, диџеи и концерти во живо.

Извор: 6yka.com 
Фото: Wikipedia