Реткиот розов дијамант од 9 карати ќе биде изложен во Франција првпат откако беше украден пред речиси 100 години, кога јавноста последен пат имаше можност да го види.
Скапоцениот камен во форма на круша, познат како „Гранд Конде“, беше украден при ноќен грабеж во замокот Шантили во октомври 1926 година, кога беше скриен во јаболко, пренесува Би-би-си.
Како беше пронајден украдениот дијамант?
Дијамантот, кој е еден од ретките кралски скапоцени камења што ја преживеале Француската револуција, беше пронајден неколку недели подоцна кога гладна собарка во хотелот во кој престојувале арамиите загризала од јаболкото во кое тој бил скриен.
„Гранд Конде“ повторно ќе биде изложен во Музејот Конде во дворецот Шантили до 3 јануари.
Директорот на музејот, Матје Делдик, вели дека иако приказната за јаболкото звучи неверојатно, во тоа време имало многу извештаи во весниците за начинот на кој бил скриен украдениот дијамант.
Тој се соочи со прашања дали изложбата е искушување на судбината, особено ако се имаат предвид низата грабежи на европски културни институции во последните 12 месеци, вклучувајќи ја и кражбата на накит од музејот „Лувр“ во Париз среде бел ден.
Иако одби да открие на колку е осигурен дијамантот, Делдик наведе дека е спроведена опсежна академска студија за единствените својства на дијамантот, за која рече дека, како и порано невидениот архивски материјал за историјата и кражбата на скапоцениот камен, е дел од изложбата.
Колку вредат ретките розови дијаманти?
Природно настанатите розови дијаманти се исклучително ретки и често се продаваат за десетици милиони долари, а највисоката цена што е некогаш постигната за еден таков дијамант на аукција била 71,2 милиони долари во 2017 година, според податоците на „Сотби“, пренесува Танјуг.
Кому му припаѓал дијамантот „Гранд Конде“?
Точното потекло на дијамантот „Гранд Конде“ не се знае, а тој првпат се споменува во 1740 година во инвентарот на Луј Анри де Бурбон, принцот од Конде, кој е составен по неговата смрт, соопштија од замокот Шантили.
Фото: X