Словенечките работници што се плашат дека работодавците не им ги плаќаат редовно придонесите за социјално осигурување отсега за тоа ќе добиваат пораки на своите паметни телефони.

Сè што треба да направат е да си инсталираат апликација на својот телефон, по што автоматски ќе добиваат известувања за евентуалните пропусти на работодавците.

- Нема да биде потребна никаква активност на корисникот, а известување ќе добиваат и кога апликацијата ќе биде затворена, така што нема да се грижат дали нивните придонеси се платени или не - објави финансиската управа на словенечкото министерство за финансии.

Неплаќањето на придонесите, особено на оние за пензиско осигурување, до пред неколку години не беше редок случај меѓу работодавци, но прописите оттогаш станаа построги. На оние што нема да ја исполнат таа обврска им се заканува казна до 30.000 евра и три години затвор.