Неизмерно сме среќни, вели Александар Зиков, татко на штипската четворка што се роди пред два дена во Скопје.
Михаил, Теодор, Ведран и Леонтина се во добра здравствена состојба и се во инкубатор. Александар и Благица ги чекале речиси пет години. Градоначалникот на Општина Штип, Иван Јорданов, вели дека ќе се слушне со таткото на штипската четворка со цел да им се помогне.
-Помеѓу она, што ние како што општина може да им го понудиме како помош е да добијат плац за изградба на куќа, со бесплатни комуналии за градба, како и бесплатна градинка за четирите деца. Тоа е во рамките на нашите надлежности - вели Јорданов.
Тој додаде дека веста ја примил со голема радост.
-Еднократно парично ќе помогнеме како Општина, но и дополнително ќе ја искористам можноста да искомуницирам со членовите на семејството, за одблизу да се информираме за економскиот статус и потребата од дополнителна поддршка во рамките на нашите надлежности. Секој поддршка е добредојдена во овој момент и ова се убави вести кои заслужуваат поддршка не само од институциите, туку од сите добронамерници - вели Јорданов.
Александар е вработен, а мајката Благица, која има 29 години, не може да добие платено породилно боледување бидејќи ѝ недостигаат две недели за да го исполни бараниот критериум од шест месеци. Четворката е предвреме родена во 31. недела. Новороденчињата се зачнати ин витро во клиника во Турција, а се родени во Универзитетската клиника за гинекологија и акушерство во Скопје.
Бебињата се долги по 31 сантиметар, а нивната тежина е од 1,150 до 1,370 килограми.
Извор: МИА