Зборовите имаат значење, но ретко ја раскажуваат целата приказна. Замислете го моментот кога пријател ве прашува: „Дали си добро?“ и вие одговарате: „Да, добро сум.“ Звучи уверливо, но рамниот тон и спуштените рамена зборуваат погласно од самите зборови.

Инстинктивно ги анализираме воздишките, паузите, подигнатите веѓи и тапкањето со нозете пред да поверуваме на нечија порака и тоа го правиме многу пати во текот на денот. Токму тоа нè води низ разговорите во ходниците, видеоповиците и незгодните први состаноци.

Едноставна комбинација од три броја – 7, 38 и 55 се обидува да објасни зошто е тоа така. Само 7 отсто од емоционалната порака доаѓа преку зборовите, 38 отсто преку тонот, а дури 55 отсто преку говорот на телото.

Недоразбирањата во канцеларија или домашните расправии редовно го потврдуваат ова, но вистинската порака зад бројките е подлабока од самата формула.

Тонот и гестовите се многу поважни од зборовите

Кон крајот на 60-тите години психологот Алберт Мехрабијан спровел истражување за тоа како луѓето проценуваат симпатија кога зборовите и изразите не се совпаѓаат. Тој пуштал снимки со зборови придружени со несоодветни изрази на лице и открил дека слушателите многу повеќе им веруваат на лицето и тонот отколку на самите зборови. Формулата што произлегла од ова истражување гласи: „Вкупна симпатија = 7 отсто вербална + 38 отсто вокална + 55 отсто привлечност преку изразот на лицето“.

Со едноставни зборови, тоа значи дека како звучите и изгледате често е поважно од тоа што всушност кажувате.

Ова „правило“ не важи за рецепти или лозинки за безжичен интернет, туку станува клучно кога емоциите се замаглени од фактите.

Ако кажете „Браво за сите“ со рамномерен тон и додека гледате во телефонот, пофалбата губи тежина. Ако ја кренете главата и употребите топол тон, пораката навистина се чувствува.

Што се крие зад бројките 7-38-55?

Мехрабијан предупредил дека формулата важи само кога сигналите се во судир.

- Кога постои несогласување помеѓу вербалното и телесното искажување став, телесниот сигнал доминира при процената на вкупниот став - вели тој.

Игнорирањето на ова предупредување доведува до митот дека 90 отсто од целата комуникација е невербална. Всушност, зборовите се тие што носат информација, а правилото само покажува каде луѓето најмногу гледаат кога се вклучени емоции.

Ако менаџерот каже „Добра работа“ додека проверува е-пошта, ќе се појави сомнеж. Истата реченица, проследена со контакт со очи и отворен став, ќе биде мотивирачка.

На состанок може некој да дава комплименти, но ако цело време гледа во часовникот, се чини дека личноста не е искрена.

Дигиталната комуникација го продлабочува јазот

Текстот одзема 93 отсто од емоционалната порака, па затоа едноставно „може“ во порака може да звучи остро. Така, луѓето се обидуваат да ја надополнат таа празнина со интерпункција и емотикони: „Фала.“ наспроти „Фала!!! :)“, но и понатаму се случуваат недоразбирања. Видеоповиците помагаат, но доцнењето, лошото осветлување и малите прозорчиња и понатаму ја замаглуваат намерата.

Објавите на социјалните мрежи можат да звучат саркастично бидејќи тонот не стигнува до читателот. Затоа треба да се додаваат клипови, објаснување или барем јасен наслов со цел публиката да ја „слушне“ интонацијата.

Невербалните сигнали не влијаат само врз чувствата, туку и врз бизнис-одлуките.

Секојдневни ситуации

Работните места зависат од повратна информација. Членовите на еден тим одлучуваат дали ќе поддржат идеи, дали ќе се стремат кон унапредување или ќе бараат нова работа врз основа на сигнали кои никогаш ги нема на хартија.

Добро темпирано кимање со главата, опуштени рамена и стабилен ритам градат доверба побрзо од „Пауер поинт“ презентација. Речиси 40 отсто од атмосферата во просторијата зависи од вокалните сигнали, па затоа начинот на кој нешто се кажува заслужува внимание.

Романтичните ситуации функционираат на ист начин. Контакт со очи создава поврзаност, додека скрстените раце предизвикуваат индиферентност. Истражувањата покажуваат дека насмевките предизвикуваат насмевка и буквално се заразни.

Како да го усовршите правилото 7-38-55?

Почнете едноставно. Усогласете го држењето со намерата. Ако се извинувате, гледајте ја личноста, зборувајте смирено и тргнете го телефонот.

Кога комуницирате онлајн, додајте контекст или пријателски емотикон за да ја надоместите изгубената невербална комуникација. На состаноци, гестовите нека ги поткрепуваат вашите зборови.

И гласот е важен. Умереното темпо и малку подлабок тон создаваат впечаток на мир, додека наглите промени во јачината можат да создадат напнатост.

Правилото 7-38-55 не значи дека зборовите не се важни, туку потсетува дека се само дел од целината. Кога емоциите се силни или нешто е навистина важно, луѓето не слушаат само што зборувате, туку и чувствуваат како го кажувате тоа.

Зборовите го поставуваат сценариото, гласот ја создава атмосферата, а телото ја носи одлуката. Кога сите три се синхронизирани, пораката остава трага.

Извор: Earth.com
Фото: Freepik