Во свет каде што повеќе од 2,2 милијарди луѓе немаат пристап до безбедна вода за пиење, а само во Соединетите Американски Држави 46 милиони луѓе живеат во небезбедни услови за вода, тим од МИТ се сврте кон небото. Наместо да ги осиромашуваат реките, езерата и подземните води, тие собираат чиста вода од огромен, често занемарен резервоар: самиот воздух.

Од водена пареа до витален ресурс

Инженерите на МИТ, предводени од професорот Ксуанхе Жао, дизајнираа пасивен систем за собирање атмосферска вода, што произведува безбедна вода за пиење во широк опсег на нивоа на влажност, вклучително и сув пустински воздух. Нивното истражување, опишува иновативен уред базиран на хидрогел, тестиран во Долината на смртта во Калифорнија.

Уредот е црн и обликуван како вертикален панел со големина на прозорец. Користи хидрогел кој набобрува додека апсорбира влага од воздухот и се собира кога испушта вода. Пареата се кондензира на стаклена комора обложена со слој од полимер за ладење, а потоа тече низ едноставна цевка како чиста, вода за пиење. Важно е што системот не бара надворешен извор на енергија, вклучувајќи електрична енергија, батерии или соларни панели.

Тестирање во пустина

Тимот спроведе теренско тестирање во Долината на смртта во текот на седум дена во ноември 2023 година. Уредот работеше пасивно на нивоа на влажност кои се движеа од 21 до 88 проценти, произведувајќи помеѓу 57 и 161,5 милилитри вода за пиење дневно.

-Ова е само доказ за концептот и има многу работи што можеме да ги оптимизираме - истакнал Вил Чанг Лиу, главен автор на студијата и вонреден професор на Националниот универзитет во Сингапур.

Иновацијата во дизајнот спречува контаминација на водата

За разлика од многу други дизајни што користат хидрогелови, кои често испуштаат сол во собраната вода, верзијата на МИТ значително ја намалува контаминацијата. Научниците вклучија глицерол во хидрогелот, за да го стабилизираат литиум хлоридот, спречувајќи го да кристализира и истекува во водата. Добиениот квалитет на водата остана во рамките на безбедните граници за пиење.

Наместо рамни листови, хидрогелот е обликуван во куполи слични на меурчиња, зголемувајќи ја површината и количината на влага што може да ја апсорбира. Половина квадратен метар хидрогел е затворен во специјално обложена стаклена комора, а кондензираната вода се собира преку едноставен систем на цевки.

Самоодржлив, скалабилен и глобално применлив

-Ова е тест за изводливоста на зголемувањето на технологијата за собирање вода. Сега луѓето можат да градат уште поголеми уреди или да ги распоредат во паралелни панели, за да им обезбедат на луѓето вода за пиење и да постигнат влијание во реалниот свет – додал Жао.

Авторите на студијата сега планираат идно тестирање во сиромашни и области ограничени со ресурси, со визија за вертикални низи на панели што снабдуваат вода до домаќинствата, дури и во пустински и оддалечени региони.

Извор: zimo.dnevnik.hr

Фото: MIT screenshot/Freepik