Шест Ирци влегуваат во бар.
Ова можеби звучи како почеток на шега, но според легендата, токму така започнал Божиќ во јули во Австралија.
Додека половина свет ужива во летниот јули, Австралија се наоѓа во длабока зима и за многумина тоа е време за лампиони и божиќни песни.
Од своите скромни почетоци во еден запуштен хотел пред неколку децении, Божиќ во јули прерасна во сакана австралиска традиција.
Оние што копнеат по вистински зимски Божиќ организираат забави каде што божиќните џемпери се задолжителни. Пабовите, рестораните и кафулињата нудат празнични оброци, а Дедо Мраз доаѓа од Северниот Пол за да подели подароци.
Овој тренд се прошири низ цела Австралија, па и до Нов Зеланд.
- Не сфаќајте ме погрешно, но одењето на плажа на 25 декември ми е едно од омилените нешта. Но, јадењето растопено сирење во зима ми е исто така омилено. Сега го славиме двапати и тоа е совршено бидејќи го добиваме најдоброто од двата света - вели Винсент Хернандез.
Тешко е точно да се утврди кога и каде почнал Божиќ во јули. Се смета дека САД први ја започнале оваа традиција уште во почетокот на 20 век, но Гери Крокет верува дека австралиската верзија започнала во неговиот хотел „Маунтин херитеџ“ во 1980 година.
Една студена јулска вечер, додека надвор паѓал снег, шест Ирци влегле во домот за гости во Катума, носталгични за еден вистински зимски Божиќ.
- Им реков, зошто да не направиме Божиќ во јули за вас? - раскажува денес 76-годишниот Крокет.
Извадиле новогодишна елка, ја украсиле со лампиони и светилки, а хотелот бил целосно украсен.
Иако деталите од тој прв божиќен оброк се веќе избледени, Крокет вели дека најверојатно имало супа од тиква и разновидни печени меса: говедско, мисиркино и свинско. За десерт, божиќен пудинг со скриена паричка меѓу сувото овошје, што е во духот на британската традиција.
Се присетува дека забавата била луда, додавајќи дека околу 80 гости „славеле“ до 3 часот наутро.
Оттогаш Божиќ во јули станал годишен настан во „Маунтин херитеџ“. Таткото на Гери, Бил, често се облекувал како Дедо Мраз.
- Така почнаа да ни доаѓаат луѓе од Сингапур, Малезија, Јапонија - раскажува Крокет.
Иако на почетокот имало некој отпор од некои локални цркви, ритуалот брзо се проширил низ целата земја.
Во Њукасл, 37-годишниот Џошуа Роб подготвил божиќно мени за своите пријатели, со трпеза украсена со божиќни крекери.
- Би го славел Божиќ десет пати годишно ако можам - вели тој. Според него, празникот во јули им овозможува на Австралијците да учествуваат во традиции што обично им се недостапни.
- Сите имаме по еден грд божиќен џемпер што се носи во Велика Британија. Ова е шанса конечно да ги носиме бидејќи не можеме да ги облечеме на 45 Целзиусови степени - вели тој.
И 47-годишниот Нил Феро е ентузијаст за Божиќ во јули. Според него, тоа е нешто што луѓето едноставно го прават во Австралија.
- Божиќ секогаш бил скара и плажа, но некако атмосферата е побожиќна кога е ладно. Јули е тежок месец, средина на зимата, па е добар начин за поврзување и славење - вели тој.
Снег, божиќни базари и празнична атмосфера
Додека некои слават во топлите домови, други уживаат во студот.
Во историскиот кварт Рокс во Сиднеј едно сокаче е претворено во зимска бајка со божиќни базари во јули, лажни машини за снег кои испуштаат пена врз минувачите.
Дрвени куќарки покрај улицата нудат зимски деликатеси: греено вино, печени колачиња и компири со кашкавал.
Нимер и Лејла Авад, кои секоја година ги посетуваат божиќните базари во Австралија, велат дека пазарите ги потсетуваат на Европа.
- Бевме во Париз во ноември на божиќните базари и таму се чувствуваше вистинскиот божиќен дух кој го нема овде - вели Лејла.
Токму тоа сакал да го постигне и Хернандез, кој се преселил од Париз пред повеќе од десет години, кога го започнал настанот во 2018 година. За да ја пресоздаде атмосферата од европските базари, тој увезол 40 дрвени куќарки од Стразбур и купил десетици елки од фарма во Сиднеј.
Фармерот Лео Дамаси вели дека продажбата на елки во јули постојано расте во последниве дваесет години.
- Секоја година интересот е сѐ поголем - вели тој.
На божиќниот тренд во јули му се приклучи и компанијата „Кентаки фрајд чикен“, но според Гери Крокет, некои ја забораваат вистинската суштина на празникот.
- Се работи за пријателство, љубов, поврзаност - сè што е спротивно од комерцијално - вели тој.
За некои, Божиќ во јули е и подобар од вистинскиот Божиќ со оглед на тоа што до декември многумина се на работ на емоционален колапс од целокупниот стрес низ годината.
- Зимата е можност да се завиткаш, да се опуштиш покрај каминот и да ја споделиш празничната магија со оние со кои сакаш да бидеш опкружен наместо со оние кон кои чувствуваш обврска - вели Крокет.
Извор:
ВВС
Фото:
Instagram