Парична казна за технолошките компании во износ од 10 отсто од нивниот годишен обрт и затворска казна за нивните директори доколку „брзо“ не отстранат насилна содржина од социјалните мрежи, предвидува новиот закон во Австралија.
Законот, донесен по предлог на парламентот, е одговор на нападот на две џамии во Крајстчрч, Нов Зеланд, каде што Австралиец уби 50 муслимански верници.
Напаѓачот во живо на „Фејсбук“ го емитуваше масакрот, а видеото масовно се споделуваше цел час пред да биде отстрането. Австралискиот премиер Скот Морисон тоа го оцени како неприфатливо.
- Заедно мора да дејствуваме за извршителите и нивните соучесници да не можат да ги користат онлајн-платформите за ширење на нивните насилни и екстремни пропаганди - овие платформи не би требало да бидат користени како оружје на злото, изјави главниот обвинител Кристијан Портер во парламентот, додека го образложуваше законот.
Отсега во Австралија е престап ако компаниите како Фејсбук и Гугл, кој е сопственик и на Јутјуб, без одложување не ги отстранат видеата или фотографиите што прикажуваат убиство, тортура или силување.
Компаниите, исто така, во „разумен рок“ треба да ја известат австралиската полиција.
(Извор: МИА)