Изнајмувањето или купувањето јахти многу луѓе ги асоцира на француската ривиера и Монако. Во малото кнежество луксузните јахти се изнајмуваат и за милион евра неделно.

Подводни салони, мини-подморници и кина на отворено - ова се само дел од содржините на јахтите што се изнајмуваат на Азурниот Брег.

Јахтата „Калила“ чини од 245.000 до 255.000 евра неделно. Подовите се од дабово дрво, ѕидовите се украсени со вредни уметнички дела, а главниот салон гледа на палубата. Секоја спална соба има посебна бања. Има опрема за нуркање и спортови на вода - кајакарење, скијање, штици за сурфање. Капацитетот на сместување е за 11 лица.


За околу 100.000 евра неделно се изнајмува јахтата „Аурелиа“. Таа има четири соби, а можат да се сместат до осум гости.


„Аурелиа“ има безвременски стил, преубав мебел и раскошна гарнитура за седење, кои создаваат елегантна и удобна атмосфера.


Посебно доживување овозможува тобоганот кој од палубата се спушта во морето.

Јахтата „Салузи“ е приспособена за забава, а нејзино изнајмување во период од седум дена чини половина милион евра.


На јахтата има казино, караоке-бар, бар на отворено, огромно кино на отворено и специфичен „морски базен“. „Салузи“ може да смести до 32 лица во 16 луксузни апартмани.


„Савана“ е јахта што можете да ја изнајмите за околу милион евра за една недела. Припаѓа на новата генерација суперјахти.


Има подводен салон наречен „Немо“, прозорци под површината на морето, сала за кино... На гостите им дава можност да го набљудуваат морскиот свет додека се опуштаат на некоја од удобните луксузни софи.


Исто така, „Савана“ поседува спа-центар, базен и персонал што вклучува и масерка и козметичари. Може да смести 12 гости во шест соби.


Јахтата „Галактика стар“ има капацитет за 12 гости кои може да уживаат на огромната палуба на повеќе нивоа, каде што има и базен.


Јахтата нуди и ВИП-апартман со приватна тераса.


Додека претходните јахти може да се изнајмат, јахтата „Софија“ е на продажба и тоа за 16.000.000 евра.


Овалните скали ги поврзуваат сите четири палуби. Во пет раскошно уредени соби може да се сместат десет луѓе.