Владата на денешната седница одлучила да престане да важи препораката за работа на продавниците, штандовите и киосците кои вршат трговија на мало за време на божиќните празници на 7 и 8 јануари 2024 година.
-Министерството за труд и социјална политика соопштува дека Владата на денешната 216. седница ја промени препораката за работа во недела и за време на божиќните празници во трговијата на мало, донесена на 214. владина седница. Имено, Владата го разгледа и прифати посочувањето на Министерството за труд и социјална политика, дека 7 јануари (недела) и 8 јануари (понеделник) се неработни денови, согласно Законот за празниците на Македонија - се вели во денешното соопштение од Министерството за труд и социјална политика.
Препораката што беше донесена на 214. седница на Владата предвидуваше за време на новогодишните и божиќните празници, односно на 31 декември 2023 година и 1 јануари 2024 година и 7 јануари и 8 јануари 2024 година да работат продавниците, штандовите и киосците кои вршат трговија на мало. Предлагач беше Министерството за економија. Како што информира тогаш владината прес-служба, целта на оваа препорака била да се излезе во пресрет на потребите на граѓаните за време на празниците, посебно во помалите градови и места каде што нема трговски центри (молови).
Извор: МИА