Експертите проговорија за последиците од поседувањето два паметни телефони - сè почеста појава во денешниот свет, особено од деловни причини. Компаниите често им даваат на вработените работен уред за да можат сите деловни комуникации да бидат одвоени од приватните, додека задржуваат личен телефон за пораки со пријателите и семејството. Според „Асошиејтед Телеком“, придобивките од овој пристап вклучуваат подобра рамнотежа помеѓу работата и животот, приватност и попрофесионален изглед на работното место. Сепак, користењето два телефона може да има и негативни последици, особено кога станува збор за менталното здравје.
Дејвид Шефилд, професор по психологија на Универзитетот „Дерби“, верува дека поседувањето два уреди може да биде поврзано со анксиозност и невротизам. „Психологија денес“ го дефинира невротизмот како „тенденција да се доживее анксиозност, депресија, самосомневање и други негативни чувства“.
- Ако сте поневротични, може почесто да го користите телефонот и да се грижите повеќе за траењето на батеријата, па затоа поседувањето два телефона ви дава чувство на сигурност - објаснува Шефилд.
Д-р Захир Хусеин, виш предавач по психологија на Универзитетот „Нотингем Трент“, вели дека поседувањето два телефона може да биде знак на страв од пропуштање вести и известувања.
- Социјалните медиуми постојано нудат нова содржина, а луѓето понекогаш несвесно ја прелистуваат од навика - додава Хусеин.
Додека некој што е строг во однос на своето лично време и го исклучува телефонот во 17 часот или по работа можеби нема голем проблем, други може да чувствуваат постојан притисок да бидат достапни.
- Многу луѓе сметаат дека мора да бидат достапни во секое време, и за лични и за професионални цели. Ова потоа води до ситуација каде што два уреда постојано бараат и одвлекуваат внимание - вели Макси Хајтмаер, истражувач за интеракција човек-компјутер на Лондонската школа за економија.
Сепак, проблемот не се само два телефона - еден паметен телефон може да предизвика низа проблеми ако се користи премногу. На пример, користењето на телефонот ноќе може да влијае врз квалитетот на вашиот сон, особено ако посегнете по него кога не можете да заспиете. Д-р Бикуан Луо, извршен директор на „Лумос Тек“, советува избегнување на социјалните медиуми во овие периоди.
-Ако не можете повторно да заспиете по 10 или 15 минути, време е да станете од кревет - вели Луо.
Наместо тоа, препорачува да одите на тивко, удобно место во вашиот дом, како што е каучот, и да се вклучите во тивка активност со ниска стимулација - читање книга или опуштање - додека повторно не почувствувате поспаност. Дури потоа треба да се вратите в кревет.
Извор: vecernji.hr
Фото: Freepik