Споделувањето вести со пријателите и следбениците на социјалните мрежи може да предизвика луѓето да мислат дека знаат повеќе за темата отколку што всушност знаат, покажува студија на истражувачи од Тексашкиот универзитет во Остин.

Луѓето што споделуваат на социјалните мрежи веруваат дека знаат повеќе за содржината што ја споделуваат, дури и ако не ја прочитале или само го ѕирнале насловот. Споделувањето може да го создаде ова зголемување на самодовербата бидејќи преку споделување информации онлајн, луѓето што ги споделуваат нештата јавно се поврзуваат со експертски идентитет. Тоа го обликува нивното чувство за себеси, помагајќи им да се чувствуваат толку добро информирани колку што нивниот пост ги прави дека изгледаат.

Ова е особено точно кога се споделува со блиски пријатели, покажува нова студија на Сузан Бронијачик, професорка по маркетинг, и Адријан Вард, доцент по маркетинг. Резултатите се релевантни во свет во кој е едноставно да се сподели содржина на интернет без да се прочита. Неодамнешни податоци од Институтот за изучување новинарство на „Ројтерс“ покажуваат дека само 51 отсто од оние што „читаат“ вест на интернет всушност ја читаат целата вест, додека 26 отсто читаат дел, а 22 отсто го погледнале само насловот или неколку реда.

Истражувачите направиле неколку студии кои ја поддржуваат нивната теорија. Во првичната истражувачите им презентирале сет од вести на 98 студенти и им рекле дека може да ги прочитаат, споделат или да ги направат двете нешта. Меѓу насловите биле и „Зошто пуканките во кината чинат толку многу“ и „Црвеното месо се поврзува со рак“.

Потоа истражувачите ги измериле субјективните и објективните знаења за секоја статија - што студентите мислеле дека знаат и што всушност знаеле. Читањето на статиите довело да зголемување и на објективното и на субјективното знаење. Споделувањето, исто така, предвидувало зголемување на субјективното знаење - дури и кога студентите не прочитале што избрале да споделат и на тој начин имале недостиг на објективно знаење за содржината.

Во втората студија студентите што споделиле статија за превенција на рак верувале дека знаат повеќе за ракот од оние што не го направиле тоа, дури и ако не го прочитале текстот.

Дополнителните студии покажале дека овој ефект се случува бидејќи луѓето го усвојуваат споделувањето во самоконцептот, што доведува до тоа тие да веруваат дека се информирани исто толку колку што постот ги прави дека се.


Потоа, во навидум неповрзана задача, симулација за планирање на пензионирањето ги информирала учесниците дека алоцирањето повеќе пари во акции се смета за „поагресивно“, додека на обврзници „поконзервативно“ и тие добиле препораки за инвестиции врз основа на нивната возраст. Потоа учесниците дистрибуирале хипотетички 10 илјади долари во фондови за пензионирање меѓу акции и обврзници. Споделувачите преземале значително поголеми инвестициски ризици. Оние што ги споделиле статиите било двапати поверојатно да преземат поголем ризик отколку што било советувано.

- Кога луѓето чувствуваат дека се поинформирани, поверојатно е да носат поризични одлуки - вели Вард.

Извор: Phys
Фото: Pixabay