Никола Мајнов, пожарникар спасител во Бригадата за противпожарна заштита на Град Скопје, е еден од хероите на градот. Прогласен е за најдобар пожарникар за минатата година. Како најтешки интервенции ги издвојува пожарите во кои гореа Министерството за правда и Природно-математичкиот факултет
Никола Мајнов, пожарникар спасител во Бригадата за противпожарна заштита на Град Скопје, е еден од хероите на градот. Прогласен е за најдобар пожарникар за минатата година.
Вели дека ова претставува големо признание за него со оглед на тоа што е прилично помлад од своите колеги, но и мотив и обврска плус понатаму да го даде својот максимум и да одговори на обврските најдобро што може.
Горд на секоја интервенција
Вели дека титулата најдобар пожарникар ја добил поради поголемиот број интервенции во изминатата година.
- Кога се мисли на интервенции, не се мисли само на пожари, туку и на технички интервенции, како што се вадење давеници, учество во разни акции за спасување и слично. Бидејќи пожарникарството го опфаќа и тој дел, а не само гасење пожари. И морам да потенцирам дека не би успеал во интервенциите да не се моите колеги, затоа што сепак ова е тимска работа и без нив не би се здобил со ова признание - вели Никола.
За него, позитивни и успешни акции се оние што завршуваат со среќен крај, односно без губење човечки животи, без поголеми материјални штети, кога работата ќе се заврши професионално и кога и пожарникарите и оштетените се задоволни од целата ситуација, односно од нејзиниот исход.
- Не би можел да издвојам акции на кои посебно сум горд бидејќи со сите досегашни се гордеам. Секоја акција си има своја тежина и еднакво сум горд на секоја. А како најтешки интервенции би ги издвоил пожарите во кои гореа Министерството за правда и Природно-математичкиот факултет. Велам потешки бидејќи се работеше за поголема површина и во урбан дел и бараа поголем ангажман и време - сподели Никола.
Секоја акција си има своја тежина
Својата професија ја опишува како хумана, пожртвувана и експедитивна. Самиот факт дека оди да направи нешто за некој што е во неволја, на кому му е потребна помош, му е доволна мотивација за да излезе на теран и да ја изврши задачата со полна пареа.
Вели дека достојно се носи со тежината на професијата и планира да продолжи и понатаму да се залага и вложува, и да го достигне врвот на професионалноста.
- Како пожарникар потребно е да се носат брзи и правилни одлуки, но не избрзани бидејќи се работи за работа со висок ризик. Физичката и менталната подготвеност се најсилните адути во оваа професија. Кога сум на терен, мислите и емоциите ги тргам настрана бидејќи само така може да се дејствува во такви ситуации. И секако најважното - за успешно извршена работа е потребен добар тим - додава Мајнов.
Неговата кариера допрва ќе расте. Негови следни стремежи како пожарникар се надградување и усовршување на знаењето и вештините во пожарникарството.
Фото: Архива на БППЗ