По рекордните 38 милиони туристи, грчката влада воведува нови ограничувања за градежништвото и мерки за заштита на животната средина за да го намали притисокот врз најпопуларните туристички дестинации.

Грчката влада претстави програма за намалување на на масовниот туризам во популарните туристички дестинации откако централната банка ја објави бројката од речиси 38 милиони посетители во 2025 година. Целта е поодржлив модел на туризам со помало влијание врз животната средина, плажите и инфраструктурата, изјави министерката за туризам Олга Кефалојани на прес-конференција.

Министерот за заштита на животната средина Ставрос Папаставру ја опиша програмата како „историска реформа“. Одлуката треба да стапи во сила на крајот од јуни. Регионите ќе бидат поделени според влијанието на туризмот, а популарните грчки острови како Родос, Кос, Санторини и Миконос подлежат на построги услови за градба. Новите хотели во тешко погодените островски региони ќе можат да имаат најмногу 100 кревети.

Владата се одлучи за ваков потег откако Централната банка извести за рекорден број туристи што лани ја посетиле Грција. Санторини и Миконос се сметаат за пренаселени во сезоната, а тамошните жители со години укажуваат на сообраќајните метежи, недостигот на вода, сè повисоките кирии и преоптоварената инфраструктура.

Градежните прописи ќе бидат построги, а новите хотели надвор од официјалните градежни подрачја ќе бидат дозволени само на големи имоти. Во зависност од регионот, тие ќе мора да бидат со површина од најмалку осум до 16 хектари.