Ротенбург об дер Таубер, живописен град во Баварија, се наоѓа на „Романтичната маршрута“ помеѓу Вирцбург и баварските Алпи и често се нарекува најубавиот град во Германија. Градот, дом на над 11.000 луѓе, изгледа како да е излезен од бајка. Тимот на „Дизни“ бил инспириран од него кога создавал многу од местата каде што живеат неговите ликови, а куќата на Пинокио буквално била копирана од Ротенбург.
Прошетката низ центарот на Ротенбург об дер Таубер е патување низ историјата. Калдрмата и шарените куќи со полудрвени кули наредени по кривулестите улици потсетуваат на средновековниот Ротенбург, чиј развој го достигнал својот врв во 15 век.
Градот е опкружен со ѕидини кои денес нудат пријатна прошетка од четири километри. Турата обично започнува кај една од петте градски порти, Редертор. Ѕидовите имаат и 42 кули, а во некои може и да влезете. Кај кулата Коболцел можете да се упатите кон срцето на градот и неговиот најфотографиран дел - стариот кварт Пленлајн.
На само неколку минути пешачење се наоѓа средновековниот музеј на злосторства и направи за тортура, најголем од ваков вид во Европа. Во близина е уште еден многу посебен музеј, Германскиот божиќен музеј. Кога ќе ја споите магијата на Ротенбург во ноември со неговиот познат базар Рајтерлесмаркт во декември, Ротенбург навистина станува зимска бајка.
Но, без разлика во кое време од годината ќе се најдете тука, сигурно ќе го сретнете ноќниот чувар во црна наметка, кој ќе ви раскаже многу анегдоти од долгата историја на градот. Тој, исто така, ќе ви каже дека најголемите непријатели на градот биле алкохоличарите - затоа што заспивале на стража, а во момент на невнимание градот можел да изгори.
Но, Ротенбург бил спасен од пијан градоначалник. По поразот во Триесетгодишната војна, градот бил ослободен во 1631 година благодарение на тогашниот градоначалник кој го прифатил предизвикот на непријателот да испие повеќе од три литри вино наеднаш. Бокалот е во колекцијата на Империјалниот градски музеј, а сеќавањето на овој настан живее и денес преку изведбата на „Der Meistertrunk“ (Голтката на мајсторот), која традиционално се изведува на Задушница.
Тој е еден од најдобро зачуваните средновековни градови во Германија и се гордее со готска и ренесансна градска куќа, средновековната црква „Свети Јаков“, како и театарот Топлер, „најубавиот театар во Баварија“.
Шармантната околина на Ротенбург, исто така, нуди многу возбудувања за сечиј вкус. Планинарите, голферите, велосипедистите и пешаците ќе го најдат своето место тука. Гурманите нема да бидат помалку разочарани поради многубројните специјалитети што може да се вкусат на ова магично место.
Извор: punkufer.dnevnik.hr
Фото: Instagram screenshot