Средните и основните училишта чиј основач е Општина Битола имаат долгови од над 285 милиони денари (околу 4,6 милиони евра), а од нив 122,8 милиони денари се долгови кон надворешни доверители, вршители на разни услуги за училиштата.
На средбата со новинарите, градоначалничката на Битола, Наташа Петровска, и секретарот на Општината, Слободан Најдовски, информираа дека долговите на училиштата секојдневно се зголемуваат поради затезните камати, извршни решенија и други финансиски проблеми.
Од Општина Битола потврдија дека две средни училишта и осум основни училишта се со блокирани сметки, средното медицинско училиште „Јован Калаузи“ должи околу 35 милиони денари, основното училиште „Крсте П. Мисирков“ должи 39 милиони денари, а со високи долгови од 16 до 30 милиони денари се и основните училишта „Александар Турунџев“, „Гоце Делчев“, „Елпида Караманди“, „Климент Охридски“ и „Коле Канински“.
Првите луѓе на битолската локална самоуправа посочија дека деновиве се посветени на надминување на проблемите со неплатени сметки за потрошена електрична енергија кои училиштата во градот не ги плаќале од април 2017 година, со што во овој момент вкупниот долг на училиштата кон ЕВН-Македонија изнесува 6,5 милиони денари, од кои 5,3 милиони денари должат основните и 1,2 милион денари средните училишта.
На иницијатива на градоначалникот на Битола, а по деветгодишна пауза, годинава по потпишаниот договор со ЈЗУ Завод за здравствена заштита-Битола ќе се изврши здравствен санитарен преглед на сите наставници во основните и во средните училишта, со што ќе биде исполнета законската обврска секој наставник да може непречено да изведува настава, беше истакнато на средбата со новинарите во Општина Битола.
Извор: МИА