Навивачите што се во Катар за Светското првенство во фудбал мора да избришат одредени апликации од своите телефони, како оние за онлајн-обложување или ЛГБТ-платформи за запознавање доколку не сакаат да бидат гонети кривично.

Навивачите се советуваат да користат телефони на кои нема апликации или телефони за еднократна употреба за да се одбегне потенцијално апсење. Обложувањето е забрането во Катар, а лицата што ќе бидат фатени може да добијат казна затвор до три месеци или парична казна од околу 800 евра.

Освен тоа, во Катар е нелегална хомосексуалноста, па апликациите за запознавање како „Грајндр“ може да доведат до апсење.

Од друга страна, секој навивач во Катар мора да ја преземе официјалната апликација на Светското првенство, која се користи за верификација на влезниците, како и апликација за следење случаи на ковид-19. Многумина се сомневаат дека станува збор за софтвери кои имаат цел да собираат податоци од навивачите за властите.

Извор: Klix
Насловна фотографија: Pixabay