Песните што зборуваат за занесот на вљубеноста, длабочината на љубовта или болката на скршеното срце допираат до голем дел од публиката.

Многу музички хитови се нераскинливо поврзани со темата љубов. Музиката одамна се покажа како исклучителен медиум за изразување љубовни чувства, а таа традиција трае уште од средниот век. Тогаш, серенадите станале популарен начин на искажување љубов, кога вљубените изведувачи ѝ посветувале и ѝ пееле романтични мелодии на својата избраничка како силен чин на верност и приврзаност. Но, оваа практика не останала во минатото, туку со текот на времето се развивала, приспособувајќи се на различни музички жанрови и културни контексти.

Популарноста на љубовните песни се должи на нивната универзална достапност. Песните што зборуваат за занесната вљубеност, за длабоките чувства или за болката по раскинувањето предизвикуваат силна емоционална реакција кај најразлични слушатели. Тие стихови и мелодии им овозможуваат на луѓето да се поврзат преку сопствените искуства – без разлика дали се работи за среќни моменти или за тешки љубовни предизвици. Токму таа можност за идентификација ги прави љубовните песни толку привлечни за публиката, а со тоа и полесни за пласирање и продажба на музичкиот пазар.

Истражување спроведено од Димитар Банков за текстовите во различни музички жанрови открива дека зборот „љубов“ е најчесто користениот збор во сите жанрови опфатени со анализата, освен во хип-хоп/рап и метал. Само во поп-жанрот зборот „љубов“ се појавува 45.000 пати во анализираниот корпус на текстови.

Извор: Vecernji.hr
Фото: Freepik