Во универзумот има многу попривлечни работи од пепелникот. Но на железничките станици низ Холандија овој предмет станува архитектонска икона.

Минатиот октомври пушењето на железничките станици стана нелегално, па железничките станици морале да ги отстранат пепелниците. Наместо да ги фрлат, тие ги зачувале, а сега имаат нова намена - со нив се полнат електричните велосипеди.


Станува збор за пилот-проект на компанијата „Лајтвел“, која ги пренаменува пепелниците што не се користат во железничките станици во станици за полнење на електрични велосипеди. Флоријан Меш, индустриски дизајнер во компанијата, вели дека тие успеале да ги пренаменат пепелниците без да им го сменат дизајнот.

Сепак, иако изгледаат речиси идентично, пепелниците сега се полначи на кои може да се полнат два електрични велосипеди истовремено. Користењето на полначите е бесплатно.


Полначите можеби нема да се користат за целосно полнење на велосипедите бидејќи за тоа се потребни часови, но веројатно ќе служат за брзо полнење во текот на патувањето, особено бидејќи електричните велосипеди стануваат сè попопуларни во Холандија.

Во рамките на пилот-проектот засега се инсталирани две вакви станици за полнење.

Автор: Марк Вилсон
Извор: fastcompany.com