Незапаметени пожари ги опустошија Северна Шпанија и Португалија во последните недели, а Европската Унија се соочува со најлошата сезона на пожари откако почнаа да се водат евиденции во 2006 година. Рекорден број од еден милион хектари изгоре низ цела ЕУ, површина приближно половина од големината на Велс, објавува Би-би-си.

Ситуацијата на Пиринејскиот Полуостров

Шпанија и Португалија се многу тешко погодени, а научниците од ЕУ проценуваат дека околу 1 % од целиот Пиринејски Полуостров е изгорен. Повеќе од две третини од вкупната изгорена површина во ЕУ се во тие две земји. Според податоците од Европскиот информативен систем за шумски пожари „Коперник“, повеќе од 400.000 хектари изгореле во Шпанија од почетокот на годината до 26 август. Ова е шест пати повеќе од просекот за истиот период помеѓу 2006 и 2024 година. Соседна Португалија, исто така, бележи црни рекорди со изгорени 270.000 хектари, речиси пет пати повеќе од просекот.

Пожарите проголтале 684.000 хектари на Пиринејскиот Полуостров оваа година, од кои повеќето изгореле за само две недели. Пожарите се концентрирани во пошумените области на Северна Португалија и во шпанските региони Галиција, Астурија и Кастиља и Леон. Пожарите не ги поштедија ниту заштитените подрачја, како што се Националниот парк Пикос де Европа, ниту пак патеката за поклонение Камино де Сантијаго, која привлекува повеќе од 100.000 посетители во лето.

Последици и врска со климатските промени

Овие настани предизвикаа најголема мобилизација на противпожарните сили во рамките на Механизмот за цивилна заштита на ЕУ досега.

Чадот од пожарите драстично го влоши квалитетот на воздухот, носен од јужните ветрови до Франција и Обединетото Кралство. Во посебна студија научниците од Кралскиот колеџ во Лондон директно ја поврзаа влошената сезона на пожари во Медитеранот со климатските промени. Пожарите, исто така, создаваат маѓепсан круг со ослободување огромни количини јаглерод диоксид (CO2) во атмосферата, дополнително затоплувајќи ја планетата. Според податоците на ЕУ, CO2 ослободен од пожарите во Шпанија оваа година достигна рекордни 17,68 милиони тони.

Научниците предупредуваат

Експертите предупредуваат дека почестите и посериозни пожари низ Европа ќе продолжат.