Десетици илјади жители на Сиднеј беа принудени на евакуација поради обилните врнежи на дожд што предизвикаа поплави во најголемиот австралиски град, со прогнози на метеоролозите дека врнежите ќе потраат.
Екстремно нискиот воздушен притисок на источниот брег на Австралија резултира со обилни врнежи во сојузната држава Нов Јужен Велс, каде што викендот наврна дожд колку што е месечниот просек.
Невремето принуди евакуација на околу 30 илјади жители во австралиската сојузна држава, а врнежите резултираа со поплавени станбени објекти, фарми, подвозници, мостови, некои објекти и по трет пат оваа година.
- Не можеме да веруваме. Тоа е поразително. Повеќето од поплавените само што ги санираа штетите од последните поплави, сега за жал сѐ се повторува - изјави градоначалничката на Камден, Тереза Федели.
Локалните медиуми јавуваат дека во тек е операција за спасување 21 член на екипажот од товарен брод што останал без напојување на отворено море јужно од Сиднеј.
Нема информации за жртви во поплавите, а властите ги повикаа жителите да се евакуираат од домовите кога ќе им биде наложено, како и да избегнуваат возење по поплавените патишта. На одредени места во Нов Јужен Велс наврнаа и 350 милиметри дожд, а прогнозите на метеоролозите се дека врнежите попладнево повторно ќе се интензивираат.
Советот за климатски промени смета дека климатските промени се фактор што придонесува за интензивните врнежи, како и дека Австралија е недоволно подготвена за справување со стихијата.
Речните сливови во земјата се блиску до максималниот капацитет, последица на интензивни врнежи предизвикани од феноменот „Ла Ниња“ што веќе две години е присутен на источниот австралиски брег.
Извор: МИА