Технолошката компанија „Мета“ е подготвена да претстави нова апликација дизајнирана како конкуренција на „Твитер“, што претставува директен предизвик на платформата за социјални медиуми во сопственост на Илон Маск.

Апликацијата за микроблогови наречена „Тредс“ се појави на „Еп стор“ на „Епл“, што укажува дека ќе дебитира утре. Наведена е како апликација за разговор базирана на текст, поврзана со „Инстаграм“, а описот посочува дека тоа е искуство со микроблогови слично на „Твитер“.

- „Тредс“ е место каде што заедниците се здружуваат за да разговараат за сè, од теми за кои се грижите до она што ќе биде тренд утре - се наведува во соопштението.

Оваа вест дојде по само неколку дена откако извршниот директор Илон Маск објави привремено ограничување на бројот на објави што корисниците можат да ги читаат на страницата на социјалната мрежа.

„Тредс“, која во суштина ќе служи како апликација за текстуален разговор на „Инстаграм“, се очекува да биде бесплатна за користење, што ќе им овозможи на корисниците да ги следат профилите што ги следат на платформата за споделување фотографии и да го задржат истото корисничко име.

Последните најави на Маск за преземање податоци од мрежата без дозвола на раководството на компанијата предизвикаа бурни реакции кај корисниците на „Твитер“, а експертите за реклами рекоа дека тоа ќе ја поткопа позицијата на новата извршна директорка Линда Јакарино, која ја презеде функцијата минатиот месец.

„Мета“ не одговори на прашањето за тоа кога може да се очекува апликацијата „Тредс“ да се најде на „Гугл плеј“.