Најдобрите два универзитета во Азија се наоѓаат во Кина. Ова го покажува најновата ранг-листа на универзитети во Азија на „Тајмс Хајр еџукејшн“. Најдобар универзитет во Азија за 2020 година е универзитетот „Цингхуа“. Тој беше прогласен за најдобар во Азија според истата ранг-листа и минатата година.


Годинава на второто место се наоѓа Универзитетот во Пекинг, кој се искачил за три места во споредба со минатата година. Искачувањето на универзитетот на листата најмногу се должи на подобрените резултати во областа на услови за истражување и заработка. Националниот универзитет во Сингапур паднал едно место и сега е трет на листата. Универзитетот за наука и технологија во Кина е единствениот нов универзитет помеѓу најдобрите десет на листата.

Седум универзитети од Кина се меѓу најдобрите 20 на листата. Јапонија има најмногу универзитети на целата листа, со дури 110 институции. Кина има 81 универзитет рангиран на листата, а Индија има 56. Највисоко рангираниот универзитет од Јапонија е Универзитетот во Токио, кој се најде на седмото место.


Најдобри 10 универзитети во Азија според „Тајмс Хајр еџукејшн“

1. Универзитет „Џингхуа“, Кина
2. Универзитет во Пекинг, Кина
3. Национален универзитет во Сингапур, Сингапур
4. Универзитет во Хонгконг, Хонгконг
5. Универзитет за наука и технологија во Хонгконг, Хонгконг
6. Технолошки универзитет „Нанјанг“ во Сингапур, Сингапур
7. Универзитет во Токио, Јапонија
8. Кинески универзитет во Хонгконг, Хонгконг
9. Национален универзитет во Сеул, Јужна Кореја
10. Универзитет за наука и технологија во Кина, Кина и Универзитет „Сунгкункван“, Јужна Кореја

Автор: Ели Ботвел
Извор: timeshighereducation.com