Архитектонската компанија „Популос“, светски лидер во дизајнот на стадиони, во соработка со локалното студио „Сараива + Асосиадос“, создаде нов план за стадионот на познатиот португалски фудбалски клуб Бенфика - Стадионот на светлината (Estádio da Luz) во Лисабон.
„Популос“ го дизајнира и оригиналниот стадион што беше отворен во 2004 година, а сега, заедно со канцеларијата во Лисабон, го предводеше развојот на план за ажурирање на дизајнот. Новиот проект предвидува модернизација на постојниот стадион, но и дополнителни објекти како што се театар, простор за настани и таканаречен навивачки плоштад.
Фасада со интегрирано осветлување
Стадионот на светлината, кој често го користи и португалската фудбалска репрезентација, ќе биде проширен со четврто ниво поставено надвор од гледачката зона, што ќе обезбеди 6.800 квадратни метри за клупски канцеларии, комерцијални објекти и угостителство.
Исто така, новата фасада ќе овозможи контрола на светлината и топлината, а истовремено ќе ги зачува препознатливите потпорни структури на покривот. Оваа фасада ќе има интегрирано осветлување, кое компанијата го опишува како програмабилна ЛЕД-кожа, која ќе се користи не само за време на натпреварите, туку и за концерти и други настани.
Стадионот ќе има нова повеќенаменска сала со капацитет од 10.000 седишта, базен со димензии 25 x 25 метри, театар и простор за настани за до 500 луѓе и две спортски сали со 2.500 и 1.500 седишта за спортови како што се кошарка, одбојка, бокс итн.
Исто така, планирано е да се изгради фудбалско игралиште на отворено на покривот, атлетска патека и разни комерцијални објекти.
- Естадио да Луз е еден од најпрепознатливите стадиони во Португалија и Европа. Овој проект ќе ги модернизира неговите објекти и ќе создаде нови погодности за гледачите на денот на натпреварот, но и за јавноста во текот на целата година - во согласност со развојот на стадионите како што се Вембли и стадионот Етихад во Манчестер - изјавил Хорхе Бетанкур, генерален партнер во „Популос“.
Навивачки плоштад инспириран од плоштадите во Лисабон
Одржливи решенија како што се зелени покриви, собирање дождовница, фотоволтаични панели на покривот и уредувања што ја поддржуваат отпорноста на животната средина се интегрирани во дизајнот.
Нов навивачки плоштад со димензии 100 x 40 метри, инспириран од плоштадите во Лисабон, ќе биде изграден пред стадионот, со сцена за диџеи и простор за настани за повеќе од 10.000 навивачи.
Статуата на Евзебиј (1942–2014), легендарниот португалски фудбалер и клупска икона, ќе биде преместена на главниот влез на плоштадот.
Подобрување на стадионот и сите поврзани објекти
- Ова е амбициозен и стратешки проект, фокусиран на нашите членови, навивачи и понатамошниот раст на клубот. Нашата цел е да ги подобриме стадионот и сите придружни објекти, да ги поддржиме сите спортови и дополнително да ја зајакнеме позицијата на Бенфика како водечка спортска институција во Португалија и светот - рекол претседателот на Бенфика, Руи Коста, некогаш легендарен фудбалер на црвено-белите од Лисабон, кој му се приклучи на клубот уште како момче.
Извор: gradnja.rs
Фото: Instagram