Пред 15 години почнал од почетничка позиција, а сега менаџира тим со повеќе од 200 вработени во оддел кој има важен удел во имиџот на компанијата
Кога си упорен, вреден, желен да научиш и пред сѐ трпелив, успехот е неминовен. Дека од најниското можеш да се искачиш и на највисокото скалило, почитувајќи ги овие начела, доказ е Димитар Димитров, директор на одделот за грижа за корисници во
Вип.
Пред 15 години почнал од почетничка позиција, а сега менаџира тим со повеќе од 200 вработени во одделот кој има важен удел во имиџот на компанијата. Но, патот не бил ниту лесен ниту брз, а во компанијата променил повеќе позиции.
Директор на одделот за грижа за корисници е од јули 2015 година.
Бев оператор број 13, но не се покажа како баксуз
Во телекомуникацискиот бизнис почнал во 2003 година во „Космофон“, како агент во контакт- центарот. Тоа се вработените кои комуницираат со корисниците и ги решаваат нивните проблеми со услугите.
- Бев оператор број 13. Но бројот не ми се покажа како баксуз - се шегува Димитров.
Работел до 2004 година како агент во овој оддел. Оттаму, како вработен кој добро се покажал, преминал во одделот за наплата, фактурирање и спречување измами. Таму останал подолго време, работејќи на повеќе позиции, до 2008 година. Потоа преминал во одделот за големопродажба на телекомуникациски услуги, па откако Вип почнал со работа како трет оператор, преминал таму на позицијата менаџер во контакт центар. Во 2009 година станал раководител на одделот за наплата, фактурирање и спречување измами.
- Тука најдолго се задржав, околу шест години. Откако се случи реорганизацијата и спојувањето на трите фирми, Близу, Оне и Вип, односно од јули 2015 година станав директор на одделот за грижа за корисници. Навистина многу промени имав, ама никогаш не ми беше досадно. Секое работно место го доживував како голем предизвик и учев многу од секаде. Во контакт центарот како агент добиваш големо и широко искуство за многу работи. Мора да ги познаваш работите затоа што корисниците се јавуваат за различни проблеми. Но, ја запознаваш целата индустрија. Во секој оддел се специјализирав за нешто ново и различно – раскажува Димитров.
Со многу труд, посветеност и ентузијазам може многу да се постигне
Веројатно на секој работник што е почетник во некоја фирма сон му е еден ден да стигне и до раководна позиција. Димитров вели дека фантазирал да напредува во тогашниот телекомуникациски бизнис во развој.
- Со многу труд, посветеност и ентузијазам секако дека може многу да се постигне. Да бидеш раководител во одделот во кој буквално си започнал како почетник. Па, навистина е задоволство кога ќе погледнам наназад.
Трпението е клучно за напредок во која било компанија. вели Димитров.
- Најважно е да си посветен работник и да имаш трпение. Ништо убаво нема да се случи преку ноќ. Јас сум среќен што мојот напредок во кариерата одеше полека. Секое унапредување треба да се заработи, да се докажеш, да ја апсолвираш таа позиција. Едноставно да станеш експерт за да биде сето тоа стабилно и одржливо. Инаку, за да отидеш по некоја случајност некаде каде што сѐ уште има голема празнина, тоа е краткорочен успех и може да те однесе само чекор назад.
Економист кој одлично ги разбира телекомуникациите
Димитров додава дека Вип препознава квалитетни луѓе, но треба време за тоа.
- Знаеме какво е нашето општество, општ впечаток е дека секаде се влегува со врски, преку разни релации. Но, јас ниту знаев некој кога се вработив ниту пак познавав некој кога се споија компаниите – вели тој.
Димитров е дипломиран економист, а телекомуникацискиот бизнис го учел во од и со практично работење.
- Постепено почнав да го разбирам, прво со помош на сите обуки, а потоа и работејќи и напредувајќи од позиција на позиција. Секаде начнував некоја нова сфера од овој бизнис. Немам образование за телекомуникации, но со многу внимание и труд за овие 15 години научив многу работи.
Одделот за грижа за корисници е навистина важен дел од компанијата.
- Нашата главна функција е да обезбедиме што подобар третман на корисниците, нивните барања и информации да бидат навремено и квалитетно одговорени преку контакт-центрите. Агентите работат навистина предизвикувачка работа. Се работи во три смени, мора да се психички спремни за секаков тип корисници. Може да ви се јави некој и да ве навреди, па потоа да добиете повик од најљубезната личност. Треба во рок од 30 секунди психолошки да бидеш спремен да го пречекаш новиот корисник без никакво влијание од претходниот. Сум го искусил тоа и навистина не е едноставно – завршува Димитров.