Истражување спроведено од „Слек“ даде интересни резултати за тоа што придонесува за неефикасност во текот на работното време.
Колку време поминувате дневно пишувајќи е-пораки? Поминатото време варира во зависност од видот на работа и позицијата, но едно неодамнешно истражување спроведено од „Слек“ покажува дека во текот на работната недела работникот во просек губи цел работен ден или нешто повеќе од 8 часа само во пишување е-пораки. Се чини дека и покрај многубројните алатки и услуги, е-поштата и понатаму е примарниот начин за деловна комуникација.
Истражувањето на „Слек“, спроведено на повеќе од 8.000 вработени во помали компании, покажало дека е-пораките, односно нивното пишување и постојаното проверување на сандачето влијае врз нивната продуктивност.
Дури половина од испитаниците сметаат дека тоа е една од причините што им отежнуваат да бидат успешни. Исто така, интересно е тоа што истражувањето покажало дека некои е-пораки вработените целосно ги игнорираат: дури шест е-пораки дневно и тоа врз основа на насловот, а некои не ги читаат оние што се подолги од осум реченици.
Речиси половина од нив пропуштаат некои е-пораки бидејќи завршуваат во фолдерот за спам, додека 44 отсто од испитаниците веруваат дека нивното сандаче е полно со неважни пораки. Така, голем број вработени, од одредена причина, без разлика дали ги игнорираат е-пораките, ги бришат или завршуваат во спам, пропуштаат некои важни деловни информации. Поради сето ова, 27 отсто од вработените сметаат дека електронската пошта е застарена форма на комуникација.
Што се однесува до бројот на напишани е-пораки, тој е речиси трицифрен во текот на една недела и вработените во просек пишуваат по 99 е-пораки неделно.
Диердре Бирн, шефица на одделот на „Слек“ за Велика Британија и Ирска, на интересен начин ја опиша електронската пошта: е-поштата е лебарката на интернетот, така што едноставно нема да умре. Врз основа на ова истражување, таа смета дека е-поштата едноставно повеќе не ја исполнува својата цел бидејќи вработените губат цел еден работен ден во неделата само во пишување е-пораки, кои понекогаш не се ни читаат.
Во такви случаи добро би дошла вештачката интелигенција која не само што би можела да состави е-пораки, туку и би можела да ги извлече најважните детали од примените е-пораки за примателите да бидат запознаени со целата содржина на е-пораките и да не мора да ги прочитаат.
Ова не е првпат „Слек“ да ја критикува електронската пошта. И претходно оваа компанија потенцираше дека вработените во компаниите треба да користат други, подобри и поефикасни начини на соработка и комуникација и, секако, подразбираат употреба на „Слек“.
Извор:
Techspot.com
Фото: Freepik