Производителите на роботи се борат за повеќе од половина милијарда долари кои би ги добиле со склучување договори со Пентагон за роботи што ќе одат во војни, каде што би уништувале бомби и би извидувале наместо војниците на бојното поле.

Според американските медиуми, војската на САД прави напори за набавка на илјадници роботи со големина на ранец, кои трупите би можеле да ги распоредуваат во опасни ситуации.

Овие роботи не се ботови-убијци способни за користење смртоносна сила автономно. Американските лидери се заинтересирани за посредни уреди кои ќе можат да вршат извидување и да деактивираат бомби.

Инвестициите делумно се предизвикани од страв дека меѓународните противници би можеле да доминираат во ова поле. Уште во мај началникот на штабот на американската армија, Марк Мили, предупреди дека Кина и Русија инвестираат многу и брзо во воздушни, копнени и водени ботови.

- Мојата лична процена е дека роботите ќе играат значителна улога во борбите за деценија или деценија и пол - рече тој.