Црната комедија
„Налепница“ по сценарио и режија на Георги М. Унковски освои награда за најдобар краток филм на
„Бруклин филм фестивал“ во Њујорк. Филмот е во продукција на Cinema Futura. Се работи за црна комедија во која главниот лик по неуспешниот обид да ја обнови својата сообраќајна дозвола тргнува на пат и запаѓа во серија проблеми. Филмот се снимаше 6 дена на повеќе локации во Скопје. Главната улога ја игра Сашко Коцев, а во филмот настапуваат и Мони Дамевски, Џевдет Јашари, Љупчо Тодоровски-Упа, Соња Стамболџиоска и Димитрија Доксевски.
Директор на фотографија е Наум Доксевски, сценографијата ја изработи Кирил Спасевски, костимите Розa Трајческа, а маската и шминката за главниот лик - Снежана Ангеловска и Ирена Сенокозолиоска. Се очекува својата премиера филмот да ја има во првата половина на 2019. Проектот е поддржан и финансиран од Агенцијата за филм на Република Македонија.