Голем број истражувања покажуваат дека луѓето со добри социјални односи се посреќни од оние што се поизолирани.

Но, што е со помалите, пообични, дури и минливи интеракции, на пример, со продавач во продавница?

Новото истражување на Есра Асигил и колегите истражува како и најкратките секојдневни социјални разговори би можеле да влијаат врз благосостојбата.

Повеќето од истражувањата за социјалните односи и благосостојбата се фокусираа на блиските односи, како што се оние со семејството и пријателите. Иако овие односи се важни, тие не се наши единствени социјални врски. Покрај овие силни врски, имаме и други кои социолозите ги нарекуваат слаби врски. Овие слаби врски ги вклучуваат разговорите со колегите, соседите со кои разговарате додека го шетате кучето или фризерот што го гледате еднаш месечно. Другите социјални врски може да се уште послаби, како разговорот со касиерката во самопослуга.

Истражувања на оваа тема открија дека интеракцијата со слаби врски е поврзана со поголема благосостојба. На пример, во еден експеримент, патниците со воз во Лондон на кои научниците им наложиле да разговараат со непознати во текот на возењето пријавиле поголемо уживање од оние од кои било побарано да не разговараат или не им биле дадени никакви упатства.

За да добијат посеопфатен поглед на тоа како различните случајни социјални интеракции можат да влијаат врз среќата, Асигил и колегите ги прашале луѓето за сите нивни интеракции со слаби врски и непознати луѓе, вклучувајќи не само разговори, туку и мали гестови како поздравување и заблагодарување.

Две истражувања, едното спроведено во Турција, другото во Обединетото Кралство, анкетирале илјадници испитаници за нивните секојдневни социјални интеракции.

Истражувачите испитувале како слабите врски и интеракциите со непознати се поврзани со задоволството од животот. Еден предизвик во испитувањето на овој вид податоци е дека може да биде тешко да се одредат причинско-последичните односи. Краткиот разговор со странци може да предизвика луѓето да бидат посреќни, како што претпоставуваа истражувачите. Сепак, исто така е можно луѓето кои се посреќни на прво место да имаат тенденција да бидат попријателски и поотворени, а тоа предизвикува почесто да комуницираат со странци. За да го решат ова, истражувачите користеле специјализирани статистички техники дизајнирани да ја зголемат нивната доверба дека секоја врска помеѓу овие интеракции и задоволството од животот е причина и последица.

Нивните резултати покажале дека почестите разговори и со слаби врски и со непознати луѓе се поврзани со повисоки нивоа на благосостојба. Иако е можно луѓето да не се сеќаваат точно колку често комуницираат со другите, ова истражување сепак дава интригантни докази дека дури и најмалите, најповршни муабети може да ја подобрат нашата благосостојба.

Извор: Psychologytoday.com
Фото: Freepik