Снимка од шефот на „Фејсбук“ во која тој зборува за приватните податоци на корисниците и социјалните мрежи предизвика критики во јавноста. Но, таа е лажна.
Технологијата наречена „deepfake“, односно компјутерски генерирани видеа што изгледаат како да се вистински, толку напредуваше во последниве неколку години што е сè потешко да се открие што е вистинска, а што лажна сминка.
Но, видеото што се појави на „Инстаграм“ привлече големо внимание бидејќи го прикажува шефот на „Фејсбук“, Марк Закерберг.
На видеото, кое изгледа како да е дел од телевизиски пренос, лажниот Закерберг зборува за контролирање на податоците.
- Замислете на секунда - еден човек кој има контрола над милијарда украдени лични податоци. Сите тајни, животи и иднини на тие луѓе. Сето тоа му го должам на „Спектaр“. „Спектар“ ми покажа дека оној што ги контролира податоците ја контролира иднината - вели лажниот Закерберг.
Видеото настана како дел од изложбата „Спектар“ што се одржува во рамките на фестивалот за документарен филм во британскиот Шефилд.
Автори на видеото се уметниците Бил Постерс и Даниел Хови, со помош на рекламната агенција „Кени“.
На прв поглед на гледачите може да им се чини дека видеото е вистинско, но откако ќе почне да зборува, гласот на Закерберг малку е необичен и не е во согласност со движењето на неговата уста.
Иако станува збор за лажно видео, тоа е доволно уверливо за да покаже колку може да биде опасна ваквата технологија.
- Оваа технологија ќе го промени начинот на кој ги раскажуваме и споделуваме нашите приказни, ги помниме луѓето што ги сакаме и создаваме содржина - вели Омер Бен-Ами од „Кени“. Тој смета дека користењето вештачка интелигенција и „deepfake“ видеа се следниот чекор во дигиталната еволуција на човештвото.
Видеото од Закерберг е едно од неколкуте направени од „Кени“ во соработка со „Постерс“. На другите видеа се појавуваат Ким Кардашијан и Доналд Трамп.
Инаку, од „Инстаграм“ порачаа дека видеото нема да биде отстрането, иако очигледно е лажно.
- Ако нашите фактографи проценат дека станува збор за лажно видео, ќе го отстраниме од резултатите на пребарувањата - порачуваат од „Инстаграм“, компанија чиј сопственик е „
Фејсбук“.