Министерот за образование и наука Абдилаќим Адеми и заменик-министерот Спиро Ристовски, денеска го посетија Студентскиот дом „Гоце Делчев”, каде по по целосната реконструкција и опремување на блокот Б, почна и обновата на блокот А, по што ќе следува етапна реконструкција и на преостанатите два блока, за студентите да бидат сместени додека течат градежните зафати.


- Пред неколку дена почна целосната реконструкција на Блок А. Вредноста е околу 1,5 милиони евра. Рокот за изведба е шест месеци. Изготвена е и техничка документација за реновирање односно целосна реконструкција на блоковите В и Г, на мензата и на партерното уредување на овој комплекс, изјави министерот Адеми.

Министерот соопшти и дека е отворен повикот за најавената изградба на два нови студентски дома - „Невена Георгиева-Дуња” во Скопје и студентскиот дом за Државниот универзитет во Тетово. Тие ќе имаат капацитети за 300 и за 350 студенти, а отворањето на документациите е закажано за 19 април.

- Исто така, објавена е и постапка за снабдување на студентските домови со осум нови лифтови, два лифта за домот „Кузман Јосифовски-Питу” во Скопје, по еден лифт за „Никола Карев” во Охрид и за „Гоце Делчев” во Скопје и четири лифтови за домот „Пелагонија” во Скопје. Ќе набавиме и нов мебел за сите студентски домови во Македонија, рече Адеми, додавајќи дека отворањето на тендерската документација ќе биде на 6 април, а планот е до крајот на годинава да бидат опремени сите студентски домови со нови лифтови.

Во студентскиот дом „Гоце Делчев” нови лифтови ќе бидат инсталирани паралелно со етапното реконструирање на блоковите.