„Honeycomb Asset Management“ што го води Давид Физел не може да ја замисли иднината на паметните телефони без ОЛЕД-технологијата.

„Бизнис инсајдер“ дојде до меморандумот што фондот им го испрати на своите инвеститори.

Во меморандумот од „Honeycomb“ истакнуваат дека мобилните со ОЛЕД-екрани би можеле да емитираат чиста слика без потреба за заднинско осветлување, што истовремено би ги направило енергетски поефикасни од сегашните уреди.

„ОЛЕД-екраните се танки како хартија, лесно се виткаат и се преклопуваат, со што можат да се стават на каква било површина, од пластика до стакло. Замислете ѕидови, прозорци и светла на автомобили со ЛЕД-екрани на себе“, стои во писмото на инвеститорите.

Фондот наведува дека паметните телефони изработени со ОЛЕД-технологија би можеле потенцијално да ја удвојат својата површина, благодарение на можностите за преклопување што ги поседува ОЛЕД-технологијата.

Оваа технологија исто така би можела да значи и подолг век за батериите на мобилните телефони, наведува инвестицискиот фонд.

„Јутјуб“ и „Нетфликс“ би можеле најмногу да профитираат од имплементацијата на ОЛЕД-технологијата кај мобилните бидејќи корисниците, благодарение на поголемите екрани, на нив ќе можат да гледаат видеа и филмови.

Од друга страна, „Гугл“ и „Фејсбук“ ќе можат на своите корисници да им прикажуваат поголеми и поефикасни огласи како придобивка од големите екрани на мобилните.

„’Голдман сакс‘ неодамна процени дека ОЛЕД-индустријата до 2020 година ќе вреди 46 милијарди долари, односно трикратно повеќе од сегашната вредност“, додава „Honeycomb“ во својот меморандум.