„Игра на троновите“, базирана на серијалот „Песна за мраз и оган“ од Џорџ Р. Р. Мартин, прикажува комплексна фантастична сага за различните благороднички семејства во Седумте кралства – од Старк и Ланистер, па сè до Таргариен во егзил. Претходната серија, „Куќа на змејот“, детално ја обработува историјата на семејството Таргариен, династијата што владеела со Вестерос со векови пред да биде соборена.

Познато е дека Ејч-би-о со години разгледува идеи за спиноф на „Игра на троновите“, уште пред завршувањето на оригиналната серија во 2019 година. Досега единствено „Куќа на змејот“ стигна до екраните, но оваа година премиера ќе има и новата серија „Витезот на Седумте кралства“. Серијата следи витез и неговиот штитоносец додека патуваат низ Вестерос во период кога змејовите се одамна исчезнати.

Сепак, „Куќата на змејот“, со своите спектакуларни битки и змејови, останува главниот наследник на „Игра на троновите“. Но, серијата ќе заврши по четвртата сезона, што отвора прашање – што следува по неа?

Големиот проект на Ејч-би-о

Извршната директорка на Ејч-би-о, Франческа Орси, неодамна во едно интервју откри дека работат на уште неколку спиноф-серии.

- Имаме и други спиноф-серии на кои работиме во моментов, од кои една навистина ветува и повторно е поврзана со семејството Таргариен. Не можеме да гарантираме кога ќе биде одобрена, но вложуваме огромен буџет во неа - изјави таа.

Важно е да се напомене дека ниту една од овие спиноф-серии не е сигурно дека ќе биде реализирана. Но, најголема шанса има онаа што ќе ја обработува случката поврзана со освојувањето на Егон Таргариен – историскиот настан што се случил околу 300 години пред „Игра на троновите“ и 150 години пред „Куќа на змејот“.

Приказната што треба да се раскаже

Ова е една од најважните приказни во светот на Џорџ Р. Р. Мартин и сосема е логично да добие телевизиска адаптација. Сценаристот Метсон Томлин веќе подолго време го развива проектот заедно со Мартин.

Сè укажува на тоа дека оваа серија ќе биде следното големо остварување по завршувањето на „Куќа на змејот“.

Што можат да очекуваат обожавателите?

Засега, љубителите на „Игра на троновите“ имаат на што да се радуваат:
- Првата сезона на „Витезот на Седумте кралства“ ќе пристигне оваа година (планирани се три сезони).
- Третата сезона на „Куќа на змејот“ е закажана за 2026 година.

Извор: Winteriscoming.net
Фото: Screenshot/YouTube