Во духот на зајакнување на соработката меѓу академската заедница и локалните самоуправи, Универзитетот „Св. Климент Охридски“ – Битола преку Центарот за алумни, кариера и доживотно учење, и во партнерство со општините Битола и Прилеп, ја реализира програмата „Универзитетска летна пракса“ (УЛП).
Програмата претставува модел на практична интеграција на студентите во реалниот сектор и ја потврдува заложбата на УКЛО за современ и применлив високообразовен процес.
УЛП не е само обична летна пракса, таа е платформа која им овозможува на студентите директен увид во начинот на функционирање на институциите, ги охрабрува да стекнат конкретни работни искуства и да развијат професионални и комуникациски вештини, неопходни за понатамошниот кариерен развој. Со самото тоа, програмата претставува мост меѓу академската подготовка и работната средина.
Во рамките на УЛП за 2025, УКЛО со Општина Битола ја реализира оваа програма трета година по ред. Во битолските јавните претпријатија и оваа година ќе бидат вклучени 40 студенти, додека во Општина Прилеп 5 студенти ќе имаат можност да учествуваат во едномесечен практикански ангажман. УЛП ќе се реализира во текот на јули, август или септември. Секој студент ќе добие месечен нето-надоместок во висина од 10.000 денари, обезбеден од соодветната општина.
УЛП низ очите на студентите: Искуства што инспирираат
Во рамките на програмата Универзитетска летна пракса многу студенти од УКЛО имаа можност да направат значаен чекор напред во нивното академско и професионално оформување. Ова се дел од нивните претходно изнесени, искрени впечатоци:
Стефани Циуновска
„Велат дека човекот учи цел живот. Летната пракса е одлична можност да ја споиме теоријата со практични знаења и вештини, со помош на професионални лица кои имаат големо искуство. За насоката што ја избрав, практичната оспособеност игра голема улога.“
Христина Гарабиљевиќ
„Ваквата можност за пракса ја сметам за соодветна за моето сегашно, а и идно стручно усовршување. Таа е начин да видиме како навистина изгледа теоријата во праксата – нешто што и професорите го бараат од нас, а и ние самите сакаме: да учиме преку реални примери.“
Ирена Мицевска
„Апсолутно сум задоволна од мојот ангажман во рамките на УЛП. Се стекнав со работно искуство и запознав луѓе кои несебично го споделија своето знаење со мене. Иако мојата идна насока е поврзана со предавање англиски, ова искуство беше драгоцено и инспиративно. На идните учесници им препорачувам: искористете ја оваа можност!“
УЛП не е само пракса – тоа е процес на трансформација.
Од УКЛО се потенцира дека УЛП е уште една потврда за сериозниот пристап на локалните власти кон поддршката на младите и нивното активно вклучување во општествениот развој, особено препознавањето на млади стручни практиканти, студенти од Универзитетот „Св. Климент Охридски“ – Битола.
Инаку, програмата е дел од пошироките активности што УКЛО ги спроведува како член на европската алијанса на универзитети КОЛОРС, што дополнително го зацврстува неговиот европски профил и стремеж кон интернационализација, мобилност и практична ориентација. Поврзувањето на УЛП со вредностите на КОЛОРС ќе овозможи нивно конкретно пресликување во оваа иницијатива, преку еднаква можност за студентите да се вклучат, да се развиваат и да придонесат во локалниот контекст. Од УКЛО оценуваат дека УЛП е уште еден показател за тоа како преку соработка меѓу универзитетите и општините, во духот на доверба, транспарентност и заеднички интерес, се создаваат услови за младите да се чувствуваат ценети, поддржани и мотивирани да останат и дејствуваат во својата срединa.
(Комерцијална објава)