Претседателот на Меѓународната фудбалска федерација (ФИФА), Џани Инфантино, рече дека ќе се разгледува можноста паузите за освежување да останат и на идните светски првенства, и покрај критиките поради дополнителните прекини.

Инфантино ја бранеше одлуката за воведување паузи за освежување на половина од секое полувреме и истакна дека тие придонесуваат за поголема забава за навивачите.

Тој рече дека ФИФА ќе анализира што ќе прави на идните турнири врз основа на ова искуство. Сепак, по критиките дека паузите се прикриен начин за вметнување реклами и воведување американски стил на тајмаут, Инфантино рече дека тие сепак имале позитивен ефект.

- Можеби тренерот може да преиспита одредени ситуации, да исправи некои грешки. Играчите добиваат малку одмор и се враќаат со полна брзина. Дали тоа е лошо? Можеби е добро. Исто така, гледаме интензитет на натпреварите. Никогаш не сме виделе 90 минути да се играат со таков интензитет на еден турнир - додаде Инфантино.

Светското првенство го одбележаа големите настапи на фудбалските ѕвезди како Лионел Меси, Килијан Мбапе и Ерлинг Халанд. Имаше и изненадувања што ги приредија дебитантите Зелено'ртски Острови и Курасао, и покрај загриженоста дека проширувањето од 32 на 48 репрезентации ќе го намали квалитетот на натпреварувањето.

Сепак, најголеми критики предизвика воведувањето паузи за освежување на сите натпревари, без разлика на локацијата и временските услови.

Гласни свирежи ги следеа овие паузи, кои се случуваат околу 22. минута од секое полувреме, особено на натпреварите играни на затворени и климатизирани стадиони, како оној во Атланта.

Инфантино рече дека паузите се неопходни поради спортска рамноправност.

- Кога би ги користеле паузите само на натпревари каде што е многу топло, а не и на другите, би дале предност или би ставиле во понеповолна положба некои тренери и репрезентации. Зошто тренерот би имал можност да влијае врз текот на натпреварот само затоа што е топло, а друг, каде што е малку посвежо, не би ја имал таа можност? - праша Инфантино.

Инфантино истакна дека ФИФА не заработува од тоа што телевизиите за време на паузите емитуваат реклами бидејќи договорите биле потпишани пред воведувањето на паузите за освежување.

Извор: 021.rs
Фото: Facebook/World Cup