Се предвидува дека бројот на заболени од рак на црниот дроб ќе се удвои во светот до 2050 година, освен ако не се преземат повеќе мерки за справување со дебелината, консумирањето алкохол и хепатитот, предупредува студија објавена во медицинското списание „Лансет“.

Ракот на црниот дроб би можел да биде дијагноза за повеќе од 1,5 милиони луѓе годишно

Доколку продолжат сегашните трендови, според податоците од Глобалната опсерваторија за рак, новите случаи на рак на црниот дроб - шестата најчеста форма на рак - ќе се зголемат од 870.000 на 1,52 милиони пациенти годишно, според податоците од студија објавена во „Лансет“. Тој е трет најсмртоносен вид рак, а студија предвидува дека ќе одземе 1,37 милиони животи до средината на векот.

Сепак, три од пет случаи на рак на црниот дроб би можеле да се спречат, изјави меѓународен тим од експерти. Ризик-фактори се консумирање алкохол, вирусен хепатит и акумулација на маснотии во црниот дроб поврзани со дебелината наречена МАСЛД, порано позната како неалкохолна масна болест на црниот дроб.

Хепатитот Б ќе убие 17 милиони луѓе до 2030 година

Исто така, се очекува вирусите што предизвикуваат хепатит Б и Ц да останат водечки причини за рак на црниот дроб во 2050 година, според студија објавена на Светскиот ден на хепатитот. Хепатитот Б и Ц можат да предизвикаат рак на црниот дроб, но вакцините можат да ја спречат инфекцијата. Вакцинацијата при раѓање е најдобриот начин за спречување хепатит Б, но покриеноста со вакцинација останува ниска во посиромашните земји, покажала студијата.

Студијата, исто така, истакнува дека доколку стапките на вакцинација не се зголемат, се очекува хепатитот Б да убие 17 милиони луѓе помеѓу 2015 и 2030 година.

Се проценува дека консумирањето алкохол предизвикува повеќе од 21 процент од сите случаи на рак на црниот дроб до 2050 година, што е повеќе од 2 процентни поени повисоко отколку во 2022 година. Ракот поради маснотии во црниот дроб поврзани со дебелината ќе се зголеми на 11 проценти, што е исто така повеќе од два процентни поени, пресметале истражувачите.

Авторите велат дека обемната студија, која ги анализирала достапните докази на оваа тема, ја истакнува „итната потреба од глобална акција“ во врска со ракот на црниот дроб. Експертите повикаа на поголема јавна свест за ризикот од рак на црниот дроб, а упатија особено предупредување до луѓето со дебелина, дијабетес или замастен црн дроб, во Европа, САД и Азија.

Извор: eklinika.telegraf.rs

Фото: Freepik