Казахстан првпат по повеќе од 70 години пушти тигар во неговото природно живеалиште, со што започна практичната фаза од долгогодишната програма за обновување на популацијата на оваа голема мачка во делтата на реката Или.

Сибирскиот тигар по име Умит која е женка, беше пуштена во природата на 31 јули во Државниот природен резерват „Иле-Балкаш“.

- Присуствувавме на навистина историски настан - изјави министерот за екологија Јерлан Нисанбајев, наведувајќи дека пуштањето на тигарот во природата е резултат на повеќе од една деценија заедничка работа на Казахстан, руски експерти, научници и меѓународни организации за заштита на природата.

Пред пуштањето во дивината, Умит помина ветеринарни прегледи и проценки на здравствената состојба, ловечките способности, однесувањето и реакцијата на присуството на луѓе.

Опремена е со ГПС/ГСМ-сателитска огрлица, а вработените во резерватот постојано го следат нејзиното движење преку сателитски податоци и камери поставени на теренот.

Возрасниот мажјак сибирски тигар, наречен Амур, и понатаму е под надзор и ќе мора да помине дополнителни проценки на однесувањето пред да биде пуштен во природата.

Двете младенчиња, Туран и Усури, ќе останат во посебно подготвени заградени простори додека не наполнат најмалку 18 месеци. Потоа експертите поединечно ќе ја проценат нивната подготвеност за живот во дивината.

Четири тигри фатени во природата беа донесени во мај од рускиот Хабаровски крај. Тие им се придружија на тигрите Богдана и Кума, кои во септември минатата година беа донесени од Холандија за размножување.


Заштитеното подрачје ги опфаќа делтата на реката Или и јужниот брег на езерото Балкаш, едно од некогашните главни живеалишта на каспискиот тигар.

Подготовките за враќање на тигрите опфатија обновување на поплавните живеалишта и зголемување на бројноста на пленот.

Министерството за екологија наведува дека долгорочната цел е воспоставување стабилна популација на тигри во делтата на реката Или и јужниот дел од областа околу езерото Балкаш.

Понатамошниот тек на програмата ќе зависи од движењето на женката Умит, нејзината успешност во ловот и избегнувањето на населените подрачја. Овие фактори ќе бидат клучни при одлуката за пуштање на преостанатите тигри во природата.

Тигрите некогаш ги населувале просторите на Казахстан долж реките Или и Сир Дарја, но ловот, уништувањето на живеалиштата и исчезнувањето на природниот плен довеле до исчезнување на каспискиот тигар од Казахстан.

Последниот забележан примерок во таа земја бил убиен во 1948 година.

Извор: 021.rs
Фото: Screenshot/YouTube