Научници од Универзитетот „Колумбија“ пронајдоа специјализирани неврони во мозокот на глувците кои им наредуваат да престанат да јадат.
Иако е познато дека многу нервни кола во мозокот го следат внесот на храна, невроните во тие кола не ја донесуваат конечната одлука за престанок со јадење на оброкот. Невроните идентификувани од научниците од Колумбија се наоѓаат во мозочното стебло, најстариот дел од мозокот на 'рбетниците. Нивното откритие може да доведе до нови третмани за дебелината.
- Овие неврони не се како кој било друг неврон вклучен во регулирањето на ситоста - истакнал Александар Нектоу, лекар-научник од Универзитетот „Колумбија“.
Клетки пронајдени во мозочното стебло
Одлуката да престанете да јадете е познат феномен.
-Тоа се случува секогаш кога ќе седнеме да јадеме: во одреден момент почнуваме да се чувствуваме сити, а потоа стануваме посити, па доаѓаме до точка каде што мислиме дека е доволно - вели Нектоу.
Како мозокот знае кога телото има примено доволно храна?
Нектоу и неговиот тим примениле нови едноклеточни техники кои овозможуваат да се ѕирне во дел од мозокот и да се препознаат различни типови клетки кои досега било тешко да се разликуваат.
За време на нивното профилирање на регионот на мозочното стебло познат по обработката на сложени сигнали, истражувачите забележале претходно непрепознаени клетки, кои имале слични карактеристики на другите неврони вклучени во регулирањето на апетитот.
Невроните го следат секој залак
За да видат како тие влијаеле врз јадењето, истражувачите ги конструирале невроните да можат да бидат вклучени и исклучени, со светлина. Кога невроните биле активирани од светлина, глувците јаделе многу помали оброци. Интензитетот на активирањето одредувал колку брзо животните престанувале да јадат.
- Интересно е што овие неврони не само што сигнализираат итно запирање, туку им помагаат на глувците постепено да го забават јадењето - велат истражувачите.
Тие, исто така, погледнале како другите нервни кола за исхрана и хормони влијаат врз невроните. Истражувачите откриле дека невроните биле „замолчени“ со хормон кој го зголемува апетитот и се активирал со агонист „GLP-1“ - класа на лекови кои сега се популарни за лекување дебелина и дијабетес. Овие експерименти откриле дека овие влезови им помогнале на невроните да го следат секој залак на глувците.
- Во суштина, овие неврони можат да намирисаат храна, да гледаат храна, да ја чувствуваат храната во устата и во цревата и да ги интерпретираат сите цревни хормони што се ослободуваат како одговор на јадењето. И на крајот, тие ги користат сите овие информации за да одлучат кога е доволно - велат истражувачите.
Иако специјализираните неврони се пронајдени кај глувци, експертите велат дека нивната локација во мозочното стебло, дел од мозокот кој во суштина е ист кај сите 'рбетници, сугерира дека е голема веројатноста луѓето да ги имаат истите неврони.
Извор: medicalxpress.com
Фото: Freepik