Матични лекари им препишуваат антибиотици на пациентите со симптоми на Ковид-19 без ниту еднаш да ги прегледаат, матурантите ќе можат да изберат проектна задача во форма на реален личен проект, творба или настан, младиот научник д-р Жарко Данилоски истражува на полето на генетиката и геномиката и предводеше истражувачки тим кој откри преку кои гени се шири инфекцијата со SARS-CoV-2. Интервјуа со скопскиот бенд Pluto’s Doubts, со визуелниот уметник Лазе Трипков, со новата директорка на Државниот инспекторат за животна средина Ана Петровска. Ова се дел од темите што ги истражувавме неделава.
„Корона-форматот на наставата - што се бара од учениците? Што се бара од нас?“ е насловот на редовната колумна на Елизабета Секирарска, професорка во средно училиште. Што значи оценката денес? Зошто сметам дека секогаш, но особено сега, во вакви услови во кои вонредието на сите ни е начин на живот, оценката не треба да биде приоритет? Како не успеавме да издефинираме, ниту по толку месеци животен хорор (не дека тоа не го знаеме како наставници, но не успеваме и како наставници, а ниту како надлежни, да излеземе од стапицата дека е најважно да имаме оценка) дека за децата сега е најважно да им обезбедиме „конекција“ со нас во вистинската, педагошка смисла поради која ќе бидат со нас без вообичаениот баласт на клишето на кое се навикнати и во кое го поминуваат најубавиот дел од својот живот? Колумната прочитајте ја тука.


Во период кога музичката дејност е на стенд-бај и голем дел од артистите се во неизвесност околу враќањето на нормалниот тек на функционирање, бендот Pluto’s Doubts продолжува да работи со полна пареа, надградувајќи го богатото резиме што го стекна изминативе пет години. Популарните „плутоси“ веќе имаат оставено значаен печат на македонската музичка сцена. Со нивното појавување во 2015 година внесоа еден нов, свеж и уникатен звук и заедно со неколку други млади бендови само потврдија дека иднината на македонскиот рокенрол е во сигурни раце.
Оваа учебна година, освен досегашните модели на проектни задачи, матурантите ќе можат да изберат проектна задача во форма на реален личен проект, творба или настан. Ова е новина која ја најави Министерството за образование и наука (МОН), а согласно која матурантите во рамките на полагањето државна матура ќе можат да сработат нешто што е во нивен домен, нешто што сакаат да го прават, а крајната цел е да бидат креативни и критични, активни и да направат нешто корисно за заедницата, како и да го прикажат својот младински активизам.
Младиот научник Жарко Данилоски откри преку кои гени се шири инфекција од SARS-CoV-2. Истражува на полето на генетиката и геномиката, а предизвик му е да совлада специфична технологија за проучување генски болести. Појавата на новиот вирус SARS-CoV-2 ги пренасочила неговите моментни научни интереси и сето досегашно искуство го употребил во истражувањето на новиот вирус. Токму овие истражувања деновиве беа објавени во престижното научно списание Cell („Клетка“). Данилоски (30) пораснал во Кичево, а средното училиште го завршил во Македонија. Дипломирал на Универзитетот „Јакобс“ во Бремен, Германија, на насоката Молекуларна и клеточна миологија, а магистрирал и докторирал на Медицинскиот центар при Универзитетот „Њујорк“ во Соединетите Американски Држави. Во моментот е доцент на катедрата по биологија на овој универзитет.