„Гугл“ започна со тестирање на нова функција во својот пребарувач наречена „АИ моуд“ (AI Mode), а некои корисници во САД веќе го пријавуваат нејзиното појавување во различни делови од интерфејсот. Оваа експериментална функција е дел од напорите на „Гугл“ да го трансформира начинот на кој корисниците пребаруваат информации - со помош на генеративна вештачка интелигенција.
Според корисничките извештаи на „X“ и „Тредс“, функцијата се појавува на различни локации: кај некои се појавува во самата лента за пребарување, веднаш до копчето „пребарување по слика“, додека кај други целосно го заменува долгогодишното копче „Се чувствувам среќно (I’m feeling lucky)“ што се наоѓа под лентата за пребарување.
Дизајнот на копчето за „АИ моуд“ исто така варира - кај некои корисници се појавува ротирачка анимација на виножито кога курсорот е поставен над него, додека во други случаи анимацијата го претставува стандардниот изглед, јасно истакнувајќи ја опцијата за чет-бот меѓу другите функции на „Гугл“.
„Гугл“ објави дека „мал процент од корисниците во САД“ ќе имаат пристап до новата опција во рамките на пребарувачот. Сепак, според портпаролката Ешли Томпсон, оваа функционалност моментално е ограничена на корисниците во рамките на експерименталната програма „Гугл лабс“.
- Често тестираме различни начини за да ги направиме нашите функции подостапни за корисниците. Ова е само еден од многуте експерименти - истакнала Томпсон.
Иако сè уште ништо не е официјално потврдено, фактот дека „Гугл“ експериментира со отстранување на копчето „Се чувствувам среќно“ кое ги води корисниците директно до првиот резултат од пребарувањето, предизвика загриженост кај долгогодишните корисници. Ова копче постои уште од самиот почеток на пребарувачот на „Гугл“ и е еден вид носталгична карактеристика за многумина.
Заменувањето на таа функција со одговори од вештачки интелигентен чет-бот би можело да значи дека „Гугл“ сè повеќе ги турка корисниците кон резимеа генерирани од вештачка интелигенција и директни одговори, наместо традиционалниот список со линкови.
„Гугл“ очигледно подготвува терен за поинтензивна интеграција на вештачката интелигенција во секојдневното пребарување, а „АИ моуд“ е само почеток. И иако сè уште не е јасно дали овој експеримент ќе се прошири глобално, едно е сигурно - класичното пребарување на „Гугл“, какво што го знаеме повеќе од две децении, е на пат кон голема трансформација.
Извор: bajtbox.com
Фото: Google screenshot