Денеска во Дојран ќе почне четиридневна Меѓународна научна конференција „Времени безбедносни бранувања или нова светска архитектура на безбедноста“ во организација на Институтот за безбедност, одбрана и мир, Филозофски факултет при Универзитетот „Св. Кирил и Методиј“ во Скопје, која ќе се одржува до 7 септември 2023 година.

Овој пат годишната конференција е посветена на промислување на механизмите за безбедност, мир и развој кои се поврзани со севкупните промени, вклучително и политички, воени, геополитички, економски, општествени и еколошки прашања низ фокусот на времените безбедносни бранувања или новата светска архитектура на безбедноста.

Меѓународната научна конференција ќе ја отворат министерката за одбрана Славјанка Петровска, деканот на Филозофски факултет, проф. д-р Ратко Дуев, претседателката на Комората на Република Северна Македонија за приватно обезбедување, м-р Верица
Милеска Стефановска, градоначалникот на општина Дојран, Анго Ангов и раководителката на Институтот за безбедност, одбрана и мир, проф. д-р Тања Милошевска.

На конференцијата ќе дискутираат над 80 учесници од Македонија, регионот и светот.

Конференцијата има цел да обезбеди форум за размена на академски знаења и емпириски сознанија за новите механизми и предизвици за безбедност (индивидуални, општествени, регионални, меѓународни и глобални), стекнување нови знаења за нивната природа, редефинирање на концептите и системите за безбедност и интензивирање на активностите на сите нивоа со цел подобрување на безбедноста и мирот.