Се проценува дека оваа година, поради пандемијата на коронавирусот, во океаните низ светот завршиле 1,56 милијарда заштитни маски, што има страшни последици врз морската флора и фауна, се наведува во извештај на невладина организација за заштита на морето со седиште во Хонг Конг.

Во извештајот на организацијата „Океани Азија“ стои дека поради непрописно фрлените маски, морскиот свет е загаден со дополнителни 4.680 до 6.240 тони пластика.

Пандемијата значително ја зголеми употребата на пластика за еднократна употреба, додека еколошки прифатливите политики се загрозени и уназадени, стои во извештајот.

- Поголемата грижа за личната хигиена и честото купување храна за носење резултираа со зголемена употреба на пластика, особено на пластична амбалажа - истакна Гари Стоукс, директор на оперативниот оддел на невладиното здружение.

Тој додава дека во меѓувреме се одложени или засега отфрлени низа мерки чија цел е намалување на потрошувачката на пластика.

Во извештајот се истакнува дека за разградување на заштитна маска се потребни дури 450 години, а за тоа време микропластиката може значително да им наштети на морскиот свет и на екосистемите.

- Од последиците од загадување со пластика секоја година смртно страдаат околу 100 илјади морски цицачи и желки, повеќе од милион птици, дури и голем број риби, безрбетници и останати животни. Процесот негативно влијае врз рибарството и туристичката индустрија, а глобалната економија ја чини околу 13 милијарди американски долари годишно - истакна Стоукс.

Во извештајот се предлага почеста употреба на заштитни маски за повеќекратна употреба и се повикуваат владите да го забрзаат развојот на алтернативни типови маски и да ја едуцираат и информираат јавноста за селектирањето на отпадот.

Извор: Al Jazeera
Насловна фотографија: Freepik