Години наназад главниот тренд беше прифаќање на новата технологија. Речиси беше императив што побрзо и подобро да се усвои сè што ќе се појави на пазарот. Но, се чини дека овој тренд забавува – младите генерации сè повеќе се враќаат на она со што пораснале нивните родители – аналогната технологија.

Според Извештајот за иднината на велнесот 2025, објавен од „Глобал велнес самит“, токму враќањето кон ретро и аналогните технологии е еден од доминантните трендови за оваа година.

Извештајот наведува дека генерацијата З и младите милениумци почнуваат да користат аналогни уреди како алтернатива на паметните телефони. Ова не значи целосно отфрлање на модерната технологија, туку намалување на нејзиното влијание врз нивниот секојдневен живот.

- Мислам дека ова е бунт против безличниот, дигитален свет на екрани и желбата за физички предмети и алатки што можат да се допрат - објаснува Бет Мекгроарти, директорка на истражувањето и додава дека младите сè повеќе сакаат да се одвојат од постојаната поплава на пасивни информации.

Бунт против гниењето на мозокот


Истражувањето покажува дека генерацијата З е единствената генерација што го намалила времето поминато на социјалните мрежи од 2021 година наваму. Во исто време, податоците на „Пју рисрч“ откриваат дека 62 отсто од младите на возраст од 18 до 24 години се „речиси постојано“ онлајн.

Трендот на дигитална детоксикација каде што телефоните се заклучени или каде што нема доволно безжичен интернет е популарен со години, но сега доживува вистински подем.

- Дигиталната детоксикација стана мејнстрим - вели Мекгроарти.

Трендот на аналогната технологија и искуства не е само минлива мода. Сè повеќе се чувствува како активистички потег за создавање „ретро иднина“ за да се врати сè што сме изгубиле во брзиот дигитален свет: човечката поврзаност, допирот и нашата способност за фокусирање.

Извор: Zimo.dnevnik.hr
Фото: Freepik