Додека во глобалните наслови доминираат Доналд Трамп и Ким Јонг-ун, кои се закануваат со меѓусебно уништување, секојдневниот живот во Северна Кореја продолжува нормално.

Фотографиите направени во септември, за време на посетата на тим од Ен-кеј њуз, покажуваат како луѓето нормално си го живеат животот.

Овие Севернокорејци имаат пикник близу водопадот Улим, близу пристанишниот град Вонсан. Со храна, пиво и караоке, тука воопшто не се чувствува дека тензиите имаат некакво влијание врз расположението на граѓаните.


Децата на фотографијата се наоѓаат во камп и носат светли спортски тренирки - ако погледнете одблиску, ќе забележите дека тренирките ги имаат логоата на западните брендови, како „Најк“ и „Адидас“.


Овој голем патнички брод се користи за поврзување на Вонсан со јапонското пристаниште Ниигата. Сепак, поради санкциите во 2006 година, се затвори фериботската служба. Тоа значи дека бродот со години е закотвен во Вонсан, но сè уште има екипаж.


Школките се популарно јадење особено во крајбрежните градови на земјата. Повеќето од нив обично се наменети за извоз и не се за локалното население. Од последната рунда санкции од ОН, на почетокот на август се забрани цел извоз на морска храна, па тие сега се повеќе достапни за локалниот пазар.


Долго време електричните велосипеди увезени од Јапонија или Кина можеле да се најдат само во главниот град. Но денес тие можат да се забележат и во помалите градови, што сугерира дека постои економски развој и надвор од Пјонгјанг.


Но транспортот останува исклучително основен. Многу градови имаат безброј велосипеди, а тука човек користи количка влечена од бик за транспорт на стари картони за рециклирање.


Жената во центарот на фотографијата има пластична кеса од јапонско-кинескиот бренд „Минисо“. Овој бренд ја отвори својата прва продавница во главниот град Пјонгјанг оваа пролет. Но поради построгите санкции, продавницата оттогаш го промени своето име.


Додека животот во голема мера се чини нормален, постојат знаци дека долгиот период на санкции си го зел данокот. Некои бензински пумпи се затворени, а недостигот од електрична енергија доведе до тоа луѓето да постават мали соларни панели на нивните прозорци - како што може да се забележи во овој стан во близина на јужниот пограничен град Каезонг.


И покрај економските тешкотии, пропагандната машина продолжува. Секоја година Денот на основањето се прославува со масовни танци во главниот град. Оваа млада жена се подготвува за изведбата.


Заканата од надворешниот свет секогаш е присутна. Затоа постојат антиамерикански транспаренти со патриотски слогани, а владините лидери ги носат гостите во таканаречениот Музеј на ослободителната војна на татковината.

Северна Кореја инсистира на тоа да остане подготвена за војна. На сликата подолу е еден од многуте резервоари. Структурата има експлозиви на дното што во случај на инвазија ќе направи огромен структурен колапс на патот за да ги блокира непријателските тенкови.