Планираните намалувања на буџетот би влијаеле врз проекти кои се тесно поврзани со откривање опасни објекти во близина на Земјата, вклучувајќи го и „НЕО Сарвајвр“, вселенски телескоп дизајниран исклучиво за лоцирање астероиди што се потенцијална закана.
Претставничкиот дом на САД одржа расправа со научници на 15 мај за прашање кое сè повеќе привлекува внимание во јавноста: што ќе направи НАСА ако открие опасен астероид кој би можел да ја погоди Земјата? Причината за дискусијата беше астероидот „2024 YR4“, кој предизвика тревога пред научниците да ја специфицираат неговата траекторија и да ја исклучат можноста за удар.
Фокусот на сослушувањето беше „НЕО Сарвајвр“ на НАСА, идна вселенска мисија посветена на рано откривање потенцијално опасни астероиди. Но, сè беше засенето од загриженоста за предлогот за буџет на администрацијата на претседателот Доналд Трамп, кој предвидува намалување од 24 проценти на буџетот на НАСА, а научните програми, вклучително и планетарната одбрана, би можеле да изгубат речиси половина од своите финансии.
Валери Фуши, демократка од Северна Каролина, истакнува дека таквото намалување би значело „најголемото годишно намалување на буџетот на НАСА во американската историја“, предупредувајќи дека тоа ја загрозува националната безбедност, технолошката конкурентност и американското лидерство во вселената.
Што е „НЕО Сарвајвр“?
Се работи за првиот вселенски телескоп дизајниран исклучиво за лоцирање астероиди кои ја загрозуваат Земјата. За разлика од претходните методи кои се потпираат на рефлексија од сончева светлина, овој систем ќе користи инфрацрвено зрачење, кое овозможува откривање на темни, неосветлени објекти, оние што тешко се гледаат од Земјата. Мисијата треба да биде лансирана до 2028 година, но сè зависи од обезбедувањето средства. Научниците истакнуваат дека телескопот може да идентификува дури 35-40 проценти од објектите во близина на Земјата што сегашната технологија ги пропушта.
Што би се случило ако НАСА го изгуби финансирањето?
Научниците предупредија дека предложените намалувања би можеле да доведат до затворање на клучни истражувачки центри, како што се центарот „Годард“ на НАСА во Мериленд и Истражувачкиот центар „Ејмс“ во Калифорнија, кои играат клучна улога во одбраната на планетата.
Без овие институции, можноста за брзо реагирање и соработка со агенции како што е ФЕМА (Федерална агенција за управување со вонредни состојби на САД) би биле сериозно нарушени. На крајот на краиштата, намалувањето на ресурсите би можело да значи дека САД ќе ја изгубат својата водечка позиција во глобалната одбрана од астероиди.
Претставникот Фуши ги прашал научниците дали вештачката интелигенција може да го подобри следењето на астероидите. Одговорот бил „да“ - вештачката интелигенција може да ја забрза обработката на податоци и да ја зголеми точноста на откривање. Но, ова бара дополнителни инвестиции.
Извор:
tportal.hr
Фото: Freepik