Првите генетски модифицирани поло коњи во светот се веќе реалност благодарение на напорите на биотехнолошка фирма со седиште во Аргентина.

„Кеирон биотек“ е фирма со седиште во Буенос Аирес која ја искористила техниката CRISPR-Cas9 за да создаде пет генетски модифицирани коњи, кои ги имаат гените на наградуваната аргентинска кобила Поло Пуреза.

Вреди да се знае дека кобилата, чие име на шпански се преведува во „Поло Чистота“, е вклучена во Куќата на славните на аргентинската асоцијација на одгледувачи на поло коњи, според извештајот на „Ројтерс“. Целта на научниците е едноставна – да направат коњи кои се посилни, поздрави и побрзи. Планот е тие да ја надминат брзината на донаторот и да постават нови рекорди во играта.

Првите генетски модифицирани коњи во светот

Се верува дека коњите создадени со гените на Поло Пуреза ќе можат да трчаат побрзо и подобро ќе се претстават на спортски терен. Габриел Вичера, коосновач и научен директор на „Кеирон“, вели дека техниката CRISPR-Cas9 им овозможила да направат прецизни пресеци во посакуваниот регион на геномот, за да направат промени.

Научниците ги уредувале гените на таков начин што би можеле да ја зголемат брзината на животното. Биле внимателни и во однос на тоа дека другите добри квалитети на шампионската кобила ќе бидат задржани и во новосоздадените коњи.

Петте коњи се родени во октомври и ноември 2024 година и моментално се згрижени во објект во Сан Антонио де Ареко, на периферијата на Буенос Аирес, Аргентина. За нив се грижи тим од ветеринари кој секојдневно ги проверува.

Идни планови за „Кеирон“ - коњи, свињи и говеда

Во разговор со „Ројтерс“, Вичера открил дека неговиот тим работи и на свињи и крави за генетско модифицирање. Целта е да ги направат органите на свињите посоодветни за трансплантација кај луѓето. Во меѓувреме, со кравите, тие имаат намера да ги направат подобро приспособени за живеење во потопли области со тоа што ќе им дадат пократки влакна.

Извор: interestingengineering.com

Фото: Freepik